Сирдарё вилоятида дарахтлар ноқонуний кесилгани аниқланди, деб хабар берди «Gazeta.uz» Давлат экология қўмитаси матбуот хизматига таяниб.
Хабарга кўра, 15 декабрь куни Оқолтин тумани С.Сиддиқов СИУ ҳудудида Sirdaryo The Capital фермер хўжалиги иш бошқарувчиси М.С кўрсатмаси билан, ёлланма ишчилар томонидан 53 сантиметр, 39 сантиметр, 42 сантиметрлик 5 дона туронғил; диаметри 83 сантиметрлик 1 дона қайрағоч ҳамда диаметри 21 сантиметрлик 1 дона тол дарахти кесилган.
Маълум қилинишича, давлат инспекторлари томонидан воқеа жойида ҳуқуқбузарларга нисбатан баённомалар расмийлаштирилиб, табиатга етказилган зарар 113 миллион сўмга баҳоланган.
Эслатиб ўтамиз, давлат ўрмон фондига кирмайдиган дарахтлар ва буталар қимматбаҳо навларининг кесилишига 2019 йил 1 ноябрдан 2020 йил 31 декабрга қадар мораторий жорий этилган эди. Ушбу ҳужжат билан мораторий амал қилиш даврида ваколатли давлат органларига дарахт ва буталар қимматбаҳо навлари кесилишига рухсат бериши ман этилган.
Экология ва атроф-муҳитни муҳофаза қилиш давлат қўмитаси дарахтлар ва буталар қимматбаҳо навларини кесилишига жорий қилинган мораторий муддатини 2021 йил 31 декабрга қадар узайтириш бўйича ҳукуматга таклиф киритган.
Аввалроқ Тошкент вилоятидаги тўқайзорда 52 та дарахт кесилгани, ўсимлик дунёсига етказилган зарар 444 миллион 773 минг сўмга баҳолангани ҳақида хабар берилган эди.
Изоҳ (0)