Руминиялик оиладан ўғирланган ва америкалик жуфтликка асраб олишга бериб юборилган Белле Барбу орадан 25 йил ўтиб биологик ота-онаси билан кўришди. Бу ҳақда Daily Mail’га таяниб «Deti.mail.ru» хабар беради.
Маълум қилинишича, Барбуни бундан 26 йил аввал Юта штатида яшайдиган эр-хотин асраб олган. 8 ёшга тўлганида асраб олинганини билганидан кейин ота-онаси ундан воз кечгани айтилган. Шунда у Руминияда туғилгани ҳақида хабар топган.
2019 йилда Барба Facebook’да асраб олинган руминияликларга ота-онасини топишга кўмаклашадиган гуруҳга дуч келади. Хабар қолдирганидан 48 соат ўтиб эса гуруҳ админи қизнинг 20 яшар укаси Мойс билан боғланади.
Шундан кейин у бошқа қариндошлари, 33 яшар опаси Симон, 29 яшар акаси Флориан, шунингдек отаси Замбила ва онаси Маргари айни вақтда Римда яшаётгани ҳақида хабар топади. Орадан уч ҳафта ўтиб эса биологик ота-онаси қизи билан телефон орқали гаплашади.
Қайд қилинишича, 1994 йилда фарзанд дунёга келганида ота-онаси камбағал бўлган. Шифокорлар уларга қизалоқ касал бўлгани ва бир неча кундан кейин вафот этганини айтиб алдаган. Аслида эса гўдак сотиб юборилган ва асраб олишга берилган бўлган.
«Ота-онам шифохонадан кетаётганида ҳамшира уларга етиб олиб, ҳақиқатни — мени ўғирлашгани ва сотиб юборишганини айтган. Ота-онам сўнгги пулини ёқилғига сарфлаб, мени топиш учун барча етимхоналарни кезиб чиққан. Аммо бир йил ўтиб пул тугаган ва қайтиб қидирадиган жой қолмаган», — дейди қиз.
Ота-онаси билан учрашишни истаган Беллу 2019 йилда уларнинг ёнига, Римга учиб борган. Кўришганида яқинликни ҳис қилган Барбу учун улардан айрилиш жуда оғир бўлган. Пандемия тугаб, чегаралар қайта очилганидан кейин у Маргари ва Замбила билан такрор кўришни истайди, дейилади хабарда.
Изоҳ (0)