Африка қитъаси доимий равишда истеъдодли ва жисмонан бақувват футболчиларни етиштириб келган ва келмоқда. Уларнинг ёрқин ўйинлари эса нафақат африкалик, балки бутун дунё мухлисларини ўзига жалб этиб келмоқда. Шундай экан, қора қитъанинг айни пайтдаги энг яхши футболчилари ҳақида фикр юритишнинг айни пайти. Демак, қуйида Африканинг бугунги кундаги энг яхши ўйинчилари ҳақида ҳикоя қиламиз.
Риёд Марез
Рўйхатни «Ман Сити» ярим ҳимоячиси Риёд Марез очиб беради. Бир вақтлар «Лестер» эртагида асосий роллардан бирини ўйнаган Марез бугунги кунда «шаҳарликлар»нинг ҳам асосий футболчиларидан саналади. 29 ёшли жазоирлик футболчи терма жамоаси сафида айтарли катта ютуқларга эришмаган бўлса-да, яшил қитъадаги саргузаштларини бемалол набираларига достон қилса бўлади.
Марез 2020/21 йилги мавсумда АПЛда 9 учрашув ўтказиб, 4 та гол ва 1 та голли узатмага муаллифлик қилди.
Садио Мане
Мане, шубҳасиз, бугунги кунда дунёнинг энг яхши футболчиларидан бири. «Ливерпуль»нинг сўнгги йиллардаги катта ғалабалида унинг хизматлари беқиёс. Мане ҳозирда 28 ёшда. Бу ёшда футболчи фаолиятидаги энг ёрқин дамларини ўтказаётган бўлади. Сенегал терма жамоаси етакчиси ҳам айнан шундай даврни бошдан ўтказмоқда.
Ҳужумчи Англия чемпионатининг 2020/21 йилги мавсумида 12 та ўйинда 4 та гол урди ва 1 та ассистни ўз ҳисобига ёздириб қўйди. Тўғри, бу ўтган мавсум билан солиштирганда бироз камроқ, лекин унутмаслик керакки, бунда коронавируснинг ҳам «ҳисса»си бор.
Калиду Кулибали
«Наполи»нинг ҳимоя қўрғонига айланган Кулибалининг хизматларига Европанинг кўплаб гранд клублари томонидан қизиқишлар билдирилди. Унинг жамоадан кетиши ҳақидаги миш-мишлар эса бир неча ой давомида тинмади. Жумладан, «Манчестер Сити» ҳақиқатан ҳам 29 ёшли сенегалликни ўз сафига қўшиб олишга жиддий бел боғлаганди. Бироқ италянлар билан келишиш ҳар доим ҳам осон бўлмаган. «Шаҳарликлар» неаполликларга футболчи борасида бир нечта таклифлар юборди, аммо уларнинг барчасига салбий жавоб қайтарилди.
Ўзининг юқори даражадаги ҳимоячи эканлигини исботлаган Кулибали 2020/21 йилги мавсумда А Сериянинг 12 турида қатнашди.
Пьер-Эмерик Обамеянг
Дортмундаги ўйинлари орқали юқори даражага чиққан Пьер-Эмериксиз бугунги «Арсенал»ни тасаввур қилиш мушкул. Жорий мавсумни юқори нотада бошламаган «канонирлар» сардори 2019/20 йилги мавсумда жамоани деярли елкасида кўтариб юрганди ва уни ҳеч бўлмаганда Европа Лигасига олиб чиққанди. Нима бўлганда ҳам Обамеянг ҳозирги кунда нафақат Африка, балки дунёнинг энг кучли ҳужумчилари қаторида тилга олинади. 31 ёшли футболчи Францияда туғилган бўлишига қарамай, Габон терма жамоаси шарафини ҳимоя қилишга қарор қилган.
2020/21 йилги мавсумда (АПЛ) унинг статистикаси қуйидагича: 13 ўйин, 3 та гол ва 1 та ассист.
Муҳаммад Салоҳ
Салоҳнинг миллионлар кумирига айланганига ҳам бир неча йил бўлди. Эътиборга молик жиҳати, у мана шу йиллар давомида ўз даражаси ва ҳужумчи учун керак бўлган самарадорлигини йўқотгани йўқ.
Тан олиш лозим, «Ливерпуль» ҳозирда дунёнинг энг кучли икки клубининг биридир. Салоҳ эса мана шу жамоанинг ажралмас қисми ва юлдузи. 28 ёшли Муҳаммад ўзининг Миср ва инглиз клубидаги ўйинлари билан бу ҳали истеъдодининг энг юқори нуқтаси эмаслигини исботламоқда.
Премьер Лига 2020/21 йилги мавсумида Салоҳ 12 та ўйин ўтказиб, 11 та гол урди ва та 2 та голга ассистентлик қилди.
Изоҳ (0)