Afrika qit’asi doimiy ravishda iste’dodli va jismonan baquvvat futbolchilarni yetishtirib kelgan va kelmoqda. Ularning yorqin o‘yinlari esa nafaqat afrikalik, balki butun dunyo muxlislarini o‘ziga jalb etib kelmoqda. Shunday ekan, qora qit’aning ayni paytdagi eng yaxshi futbolchilari haqida fikr yuritishning ayni payti. Demak, quyida Afrikaning bugungi kundagi eng yaxshi o‘yinchilari haqida hikoya qilamiz.
Riyod Marez
Ro‘yxatni “Man Siti” yarim himoyachisi Riyod Marez ochib beradi. Bir vaqtlar “Lester” ertagida asosiy rollardan birini o‘ynagan Marez bugungi kunda “shaharliklar”ning ham asosiy futbolchilaridan sanaladi. 29 yoshli jazoirlik futbolchi terma jamoasi safida aytarli katta yutuqlarga erishmagan bo‘lsa-da, yashil qit’adagi sarguzashtlarini bemalol nabiralariga doston qilsa bo‘ladi.
Marez 2020/21-yilgi mavsumda APLda 9 uchrashuv o‘tkazib, 4 ta gol va 1 ta golli uzatmaga mualliflik qildi.
Sadio Mane
Mane, shubhasiz, bugungi kunda dunyoning eng yaxshi futbolchilaridan biri. “Liverpul”ning so‘nggi yillardagi katta g‘alabalida uning xizmatlari beqiyos. Mane hozirda 28 yoshda. Bu yoshda futbolchi faoliyatidagi eng yorqin damlarini o‘tkazayotgan bo‘ladi. Senegal terma jamoasi yetakchisi ham aynan shunday davrni boshdan o‘tkazmoqda.
Hujumchi Angliya chempionatining 2020/21-yilgi mavsumida 12 ta o‘yinda 4 ta gol urdi va 1 ta assistni o‘z hisobiga yozdirib qo‘ydi. To‘g‘ri, bu o‘tgan mavsum bilan solishtirganda biroz kamroq, lekin unutmaslik kerakki, bunda koronavirusning ham “hissa”si bor.
Kalidu Kulibali
“Napoli”ning himoya qo‘rg‘oniga aylangan Kulibalining xizmatlariga Yevropaning ko‘plab grand klublari tomonidan qiziqishlar bildirildi. Uning jamoadan ketishi haqidagi mish-mishlar esa bir necha oy davomida tinmadi. Jumladan, “Manchester Siti” haqiqatan ham 29 yoshli senegallikni o‘z safiga qo‘shib olishga jiddiy bel bog‘lagandi. Biroq italyanlar bilan kelishish har doim ham oson bo‘lmagan. “Shaharliklar” neapolliklarga futbolchi borasida bir nechta takliflar yubordi, ammo ularning barchasiga salbiy javob qaytarildi.
O‘zining yuqori darajadagi himoyachi ekanligini isbotlagan Kulibali 2020/21-yilgi mavsumda A Seriyaning 12 turida qatnashdi.
Pyer-Emerik Obameyang
Dortmundagi o‘yinlari orqali yuqori darajaga chiqqan Pyer-Emeriksiz bugungi “Arsenal”ni tasavvur qilish mushkul. Joriy mavsumni yuqori notada boshlamagan “kanonirlar” sardori 2019/20-yilgi mavsumda jamoani deyarli yelkasida ko‘tarib yurgandi va uni hech bo‘lmaganda Yevropa Ligasiga olib chiqqandi. Nima bo‘lganda ham Obameyang hozirgi kunda nafaqat Afrika, balki dunyoning eng kuchli hujumchilari qatorida tilga olinadi. 31 yoshli futbolchi Fransiyada tug‘ilgan bo‘lishiga qaramay, Gabon terma jamoasi sharafini himoya qilishga qaror qilgan.
2020/21-yilgi mavsumda (APL) uning statistikasi quyidagicha: 13 o‘yin, 3 ta gol va 1 ta assist.
Muhammad Saloh
Salohning millionlar kumiriga aylanganiga ham bir necha yil bo‘ldi. E’tiborga molik jihati, u mana shu yillar davomida o‘z darajasi va hujumchi uchun kerak bo‘lgan samaradorligini yo‘qotgani yo‘q.
Tan olish lozim, “Liverpul” hozirda dunyoning eng kuchli ikki klubining biridir. Saloh esa mana shu jamoaning ajralmas qismi va yulduzi. 28 yoshli Muhammad o‘zining Misr va ingliz klubidagi o‘yinlari bilan bu hali iste’dodining eng yuqori nuqtasi emasligini isbotlamoqda.
Premyer Liga 2020/21-yilgi mavsumida Saloh 12 ta o‘yin o‘tkazib, 11 ta gol urdi va ta 2 ta golga assistentlik qildi.
Izoh (0)