Профессионал бокснинг супер ўрта вазн (-76,2 кг) тоифасида рингга чиқаётган Бектемир Мелиқўзиев (6-0, 5 КО) ўзининг навбатдаги жангини 2021 йил 30 январида ўтказадиган бўлди.
Бектемир Москвадаги «Лужники» стадионида ташкил этиладиган бокс оқшомининг асосий жангида рингга чиқади. Ўзбекистонлик боксчига россиялик Сергей Ковалёв (34-4-1, 29 КО) рақиблик қилади. Ушбу маълумотни россиялик боксчининг ўзи ҳам тасдиқлади.
Жанг томонларнинг келишувига кўра 80,7 кг вазнда ўтказилади. Тўқнашув DAZN платформаси томонидан онлайн трансляция қилинади.
Маълумот учун, Сергей Ковалёв ярим оғир вазн тоифасида WBA Super, IBF ва WBO чемпионлик камарларининг собиқ соҳиби ҳисобланади. У профессионал боксда ҳозирга қадар 34 та жангда ғалаба қозонган, шундан 29 тасида рақибларини нокаутга учратган. 4 та жангда мағлуб бўлган, 1 та жанги эса дуранг билан якунланган.
Ковалёв ўзининг сўнгги жангини 2019 йил 2 ноябрида мексикалик Сауль «Канело» Альваресга қарши ўтказиб, 11-раундда нокаутга учраб мағлуб бўлган.
Бектемир Мелиқўзиев ҳозиргача профессионал боксда 6 та жанг ўтказиб, уларнинг барчасида ғалаба қозонган, 5 та жангда рақибларини нокаутга учратган.
Бектемир сўнгги жангини 2020 йил 30 октябрида мексикалик Алан Кампага (17-6, 11 КО) қарши ўтказиб, 3-раунддаги нокаут эвазига ғалаба қозонганди.
Изоҳ (0)