Коронавирус инфекцияси пандемияси муносабати билан Европа аҳолисига Рождество ва Янги йилни кутиб олиш учун иложи борича кўчада тўпланиш тавсия этилади. Бундай банд Жаҳон соғлиқни сақлаш ташкилоти (ЖССТ) томонидан байрамлар арафасида атайлаб чиқарилган тавсиялар ичига киритилган, деб ёзади «РБК».

Фото: Reuters

«Имкон борича кўчада тўпланиш керак, шунда ҳам ниқоб тақиб, масофага риоя қилиш керак», — дейилади тавсияда. Байрамларни бино ичида нишонлашда эса жуда кўп одамлар йиғилмаслигига, хона эса яхши шамоллатилишига эътибор бериш керак — бу касалликни юқтириш хавфини камайтиради.

ЖССТ тушунтиришича, бино ичида ўтказиладиган байрамлар ҳатто меҳмонлар кам бўлса ҳам хавфлидир: одатда бундай меҳмондорчиликларда турли ёшдаги ва турли оилалардан келган одамлар иштирок этади.

Ташкилот фикрича, коронавирус инфекциясининг олдини олиш чораларига риоя қилмаслик оқибатида 2021 йилнинг илк ҳафталари ва ойларида Европада COVID-19 яна авж олиши мумкин. ЖССТ ҳукуматларга касаллик янада тарқалиши хавфларини камайтириш учун баъзи тавсияларни берди.

Мамлакатлар Рождество ярмаркалари ва оммавий байрам тадбирларини бекор қилиш имкониятини кўриб чиқиши керак. Рождество ибодатларини очиқ ҳавода ўтказиш ва иштирокчилар сонини чеклаш керак. Тоғ-чанғи курортларида одамларнинг ёпиқ биноларда оммавий тўпланишларини тақиқлаш керак. Фуқаролар эса байрам кунлари одатда ўта гавжум бўладиган жамоат транспортидан узоқроқ юриши керак.

Бир қатор Европа мамлакатлари Рождество ва Янги йил байрамлари куни ҳам амалда бўладиган чекловларни жорий қилмоқда. Хусусан, 16 декабрь кунидан Буюк Британия пойтахтида COVID-19 коронавирус инфекцияси тарқалиши муносабати билан чеклов чораларининг учинчи — энг юқори даражаси амал қилишни бошлади. Германияда коронавирус билан боғлиқ оғир вазият туфайли 16 декабрдан бошлаб камида 10 январга қадар давом этувчи қатъий локдаун жорий этилди. Франция бош вазири Жан Кастекс эса мамлакатда 15 декабрдан комендантлик соатини эълон қилди, у соат 20:00 дан соат 06:00 гача амал қилади. Комендантлик соати Янги йил кечаси ҳам кучда бўлади.