АКТ вазирлиги Навоий шаҳридаги Telekom Devices PRO МЧЖ томонидан ишлаб чиқарилган смартфонларга давлат герби тасвири туширилгани, бу амалдаги қонунларга зидлиги ҳақида ижтимоий тармоқлардаги чиқишларга муносабат билдирди. Вазирликнинг маълум қилишича, бундай смартфонлар тижорий мақсадларда фойдаланилмаган, дея хабар қилмоқда «Kun.uz».
Навоийдаги эркин иқтисодий зонада жойлашган Telecom Devices PRО томонидан «Ўзбекистон» деб номланган, 64 гигабайт хотирага эга смартфонлар ишлаб чиқарилаётгани, у ички бозорга мўлжаллаб тайёрлангани ҳақида хабарлар тарқалди. Телефон панелининг марказий қисмига Ўзбекистон герби туширилгани ижтимоий тармоқларда навбатдаги муҳокамаларни келтириб чиқарди.
Фойдаланувчилар «Ўзбекистон Республикаси давлат герби тўғрисида»ги қонуннинг 5-1-моддасида давлат гербининг тасвири туширилган белгилардан ишлаб чиқарилаётган ёки реализация қилинаётган товарларни ўтказиш учун тижорат мақсадларида фойдаланиш мумкин эмаслиги белгиланган ҳолда сотиш учун ишлаб чиқарилаётган смартфонларга ушбу қонунга зид равишда давлат рамзи тасвири ишлатилганига эътироз билдирган.
Шунингдек, айрим ўзбекистонликлар қонуннинг ушбу нормасини била туриб, ушбу телефонни ишлаб чиқаришга лицензия ва мувофиқлик сертификатини берилганини танқид қилган.
Нашр мухбири ушбу эътирозлар юзасидан Ахборот ва телекоммуникацияларни ривожлантириш вазирлиги ахборот хизмати раҳбари Шерзод Аҳмадовдан изоҳ сўради. Вазир матбуот котибининг таъкидлашича, давлат герби тасвири туширилган смартфонлардан тижорий мақсадларда фойдаланилмаган, улар вазирлик ва идораларнинг буюртмасига кўра чекланган миқдорда чиқарилган.
«Давлат герби тасвири туширилган смартфонлар тижорий мақсадларда фойдаланилмаган. Корхонада гравировка асосида давлат герби тасвири туширилган смартфонларни вазирлик ва идораларнинг буюртмасига кўра чекланган миқдорда чиқарган бўлиб, давлат рамзи тасвиридан тижорат мақсадида фойдаланилмаган.
Бошқа буюртмачилар, яъни Миллий банк, Ucell ва Uzmobile каби буюртмачилар талабига кўра, смартфон панелининг марказий қисмига буюртмачилар хоҳлаган логотип тасвирлари туширилган ҳолда ишлаб чиқарилган. Маҳаллий бозорларда ‘Ўзбекистон’ смартфонлари I-Devices бренди остида сотилган», — дейди Шерзод Аҳмадов.
Маълумот учун, Telecom Devices PRО масъулияти чекланган жамияти 2016 йилнинг 8 ноябрь куни ташкил топган бўлиб, асосий фаолияти телекоммуникация қурилмаларини ишлаб чиқаришдан иборат. Давлат статистика қўмитасининг очиқ маълумотларига кўра, Telecom Devices PRO’нинг устав фонддаги барча улуши «Ўзбектелеком»га тегишли ҳисобланади.
АКТ вазирлигининг маълум қилишича, «Ўзбекистон» миллий смартфонини ишлаб чиқариш 2019 йил 24 августдаги ПҚ-4426-сонли Президент қарори ижроси доирасида йўлга қўйилган. Дастурий таъминоти ўзбекона тусга эга ушбу маҳсулотга Ўзбекистон ҳукумати маълумотларини ўз ичига олган ҳукумат дастури юкланган. Электрон кооперация портали маълумотига кўра, ушбу смартфон ишлаб чиқарувчи томонидан 3 миллион 499 минг сўм қийматда таклиф этилмоқда. Telecom Девиcес PRО раҳбари Нодир Раҳимов ЎзА мухбирига берган интервьюсида «Ўзбекистон» смартфонлари бошланишига 3000 дона ишлаб чиқарилгани, айни пайтда маҳсулотнинг 50 фоиздан кўпроғи сотилганини маълум қилган.
Аввалроқ Ўзбекистондаги 12 246 та аҳоли яшаш масканининг 56,8 фоизида 3G алоқаси мавжуд эмаслиги, Ўзбекистонда аҳолини интернет тармоғи билан қамраб олиш даражаси 87 фоизга етказилгани ҳамда Ўзбекистондаги алоқа компаниялари истеъмолчиларга 22,5 миллиард сўмдан кўпроқ зарар етказгани ҳақида хабарлар берилганди.
Изоҳ (0)