Юлдузнинг сўниши: Голливуд студиялари нима учун Жонни Депп билан ишлашдан бош тортмоқда?

Голливуднинг энг талабгир актёрларидан бири бўлган Жонни Депп ҳаётидаги сўнгги ўзгаришлар, собиқ турмуш ўртоғи, актриса Эмбер Херд билан шов-шувларга сабаб бўлган ажрашиши билан боғлиқ суд жараёнлари сабаб йирик киностудиялар актёр билан ҳамкорлик қилишни истамаяпти. Шунга қарамасдан, ижодкор миллионлаб мухлислар учун ҳали-ҳамон севимли ҳисобланади. Meduza Американинг The Hollywood Reporter (THR) нашри томонидан актёр ҳақида тақдим қилинган катта мақоладаги энг қизиқ маълумотларни тақдим қилади.

Шахсий ҳаётнинг карьерага таъсири

1985—2018 йилларда иштирокидаги фильмлар прокатда 10,2 миллиард доллар тўплаган актёр карьерасининг сўнгги йилларини аввалгидек муваффақиятли деб бўлмайди. Бунга шахсий ҳаётидаги муаммолар сабаб бўлган. Ҳаммаси 2016 йилда, собиқ рафиқаси билан ажрашиш жараёнида, Эмбер уни куч ишлатишда айблаганидан бошлаган. Шундан кейин Депп ҳам қараб турмаган ва Эмберга, шунингдек, The Sun нашри ва менежерларига қарши даво очган. Судлашиш жараёнларида актёрнинг шахсий ҳаётидаги бошқа икир-чикирлар: наркотик ва зўравонлик билан боғлиқ маълумотлар маълум бўла бошлаган. Жоннининг ижод борасидаги омади кетишига унинг ўзини тутишигина эмас, агрессив юридик тактикани танлагани сабаб бўлган.

У юристи Адам Уолдман билан 2016 йилда Саудия шаҳзодаси Абдул-Азиз ибн Салмон билан танишганидан кейин бир неча йиллик агенти билан шартномани бекор қилган, менежери ва адвокатини судга берган. Очилган даъво Депп ҳисобига ҳал бўлганига қарамай, судлашиш жараёнида унинг молиявий аҳволи ҳақидаги батафсил маълумотлар оммага маълум бўлган. Актёр The Washington Post газетасидаги зўравонлик ҳақидаги мақола сабаб собиқ рафиқасига ҳам даъво очган (суд жараёнлари 2021 йилда бўлиб ўтади).

Рафиқасининг «тагига сув қуйиш»га уринган Депп

Шундан кейин актёр Хердни «Аквамен»дан ҳайдалишини истаган ва мақсадига эришиш учун Warner Bros студияси билан алоқадор бўлган синглиси Кристи Дембровскини ишга солган. Унинг ушбу мазмундаги ёзишмаси The Sun билан суд жараёнида эълон қилинган. Судда тақдим қилинган бошқа бир ёзишмада Депп собиқ рафиқасини қоғозга ўраб айтганда «50 чақалик стриптизчи» деб атаган.

Студиялар томонидан рад этилиши

«Кариб денгизи қароқчилари: ўликлар эртак айтмайди» фильмининг суратга олиш жараёнида 8 дона таблетка қабул қилган актёр бармоғини кесиб олган ва Австралиядан Лос-Анжелесга қайтиб кетишига тўғри келган. Бунинг оқибатида суратга олиш жараёни 2 ҳафтага тўхтатилган ва ҳар бир беҳуда сарфланган кун Disney’га 350 минг долларга тушган.

Суратга олиш майдончасида актёр билан боғлиқ муаммолар ҳам кузатилган. У продюсер ассистентига сценарийни айтиб турганига эътироз билдирган. Шунингдек, бошқа ишчи ходимлардан 24 соат давомида ўзи, болалари ва уйини қўриқлаб туришни талаб қилган.

Кўпчилик у билан ишлашдан бош тортган вақтда «Кариб денгизи қароқчилари» продюсери Жерри Брукмайхер актёрни қўллаб-қувватлаган. У Disney компаниясидагиларни Деппни «Кариб денгизи қароқчилари» франшизасининг спин-оффига олишга кўндиришга уринган. Аммо компания бундан бош тортган.

Деппга «Жоду салтанати»нинг 3-қисмидаги кичик иштироки учун 16 миллион доллар тўланган. Актёр The Sun билан судда ютқазганидан кейин ушбу фильмдан ҳайдалган. Аммо у билан тузилган шартномада ҳеч қандай ахлоқ билан боғлиқ банд бўлмагани сабаб Warner Bros студияси Деппга умумий суратга олиш ишлари учун берилиши керак бўлган гонорарни тўлиқ тўлашга мажбур бўлган.

У охирги марта суратга тушган фотосуратчи ҳақидаги «Буюк» фильмидаги иштироки учун эса 3 миллион доллар олган. Аслида бундан икки карра кўпроқ тўланиши керак бўлган маблағнинг камайтирилишига 2018 йилда экран юзини кўрган «Ёлғонлар шаҳри» фильмининг суратга олиш жамоаси аъзосининг Деппни қўл кўтаришда айблаб судга бергани сабаб бўлган.

Бу каби воқеалар эса йирик компанияларнинг юлдуз билан ишлашдан бош тортишига сабаб бўлган. Шунга қарамасдан актёрнинг молиявий аҳволига у қадар зарар етмаган. У Багама оролларидаги уч оролдан тортиб бошқа катта мулкларга эгалик қилади.

Даъволардан бирининг кўриб чиқиш жараёнида Жоннининг 14 та кўчмас мулк объекти харид қилгани, дўсти, журналист Хантер Томпсоннинг хокини махсус замбаракдан ҳавога сочиш учун 5 миллион доллар сарфлагани маълум бўлган.

Шунга қарамай, мухлислари ҳали ҳам унга содиқ. Голливуднинг антикризис пиар бўйича мутахассиси Эрик Шиффернинг таъкидлашича, Жоннининг мухлислари серғайратлиги ва садоқати билан Трампнинг мухлисларига ўхшайди. Time’s Up Legal Defense фонди асосчиси Роберт Каплан эса актёрнинг ижтимоий тармоқ фойдаланувчилари томонидан ҳужумга учрашига ҳаммадан ҳам кўп Хердга нисбатан даъво очгани сабаб бўлган деб ҳисоблайди.

Американинг Marketing Evaluations агентлиги томонидан тузилган машҳур шахслар рейтингида 2012 йилда иккинчи бўлган актёр 2020 йилда 20-ўринга лойиқ деб топилган.