Ўзбекистонда хизмат кўрсатган артист Клара Жалилова 20 ноябрь куни 83 ёшда ҳаётдан кўз юмди. Актриса «Мафтунингман» фильмидаги бош қаҳрамон Юлдузхон образи билан томошабинлар меҳрини қозонган эди.
Ўзбекистон халқ артисти Ёқуб Аҳмедов ва Клара Жалилованинг ўғли Фурқат Аҳмедов журналист Наргиза Муродова билан суҳбатда онасининг сўнгги кунлари тўшакка михланиб қолгани ҳамда ўй-кечинмалари, армонлари ҳақида сўзлаб берди.
«Онани йўқотиш оғир экан»
Она неча ёшда бўлишидан қатъи назар, барибир уни йўқотиш оғир кечар экан. Йил бошида онам билан муборак Умра сафарида бўлиб қайтдик. Кайфиятлари аъло даражада эди. Онам табиатан озодаликни хуш кўрадиган инсон эди. Саксон ёшдан ошдим, энди бу ишларни қилишим шарт эмас, демасди. Келинлардан аввал туриб, кўп қаватли уй ёнидаги ҳовлиларни тозалаб қўярди. Афсуски, Рамазон ойида сахарликдан сўнг кўчаларни тозалашга чиққанда, оёғи зинадан тойиб йиқилиб тушди. Кексалик сабаб, кичик жароҳат ҳам қаттиқ азоб берди. Қариганда дарднинг келиши осон, кетиши қийин дейишгани шу бўлса керак.
Онам кенжа укам Шавкат билан бирга турарди. Аҳволларидан ҳамиша бохабар бўлиб туриш учун ётоқхоналарига кичик камера қўйиб қўйгандим. Деярли ҳар икки соатда алоқага чиқардим. «Хавотир олма, мен яхшиман, тез орада соғайиб кетаман», деб кулиб қўярди. Кўнглим сезгандек ўлимларидан аввал барча қариндош-уруғларга қўнғироқ қилиб: «Онамдан рози-ризолик олинглар» дегандим. Катта-ю, кичик зиёрат қилиб, кўнгилларини кўтаришди. Устоз деб билган санъат вакиллари ҳам ташриф буюришди. Афсуски, 20 ноябрь куни, тонгги соат 07:30 да жонлари узилди.
«Икки турмуши ҳам бахтли якунланмади»
Онам раҳматли «Ҳаётда чиройли аёлларга ниҳоятда қийин» деган гапни кўп айтарди. Чунки у ҳаромдан нафратланган, санъат учун ҳам номусини сотишни истамаган аёл эди. Шунинг учун ҳам ҳаётда кўп қийинчиликларга учраган. Афсуски, душманлар унга жуда оғир зарбаларни беришган. Архивдаги қўшиқларининг сув босиб кетиши ҳам айнан таклифни рад этгани билан боғлиқ. Отам билан ажрашгач, бир неча йилдан сўнг Рустам Ниғматов исмли чангчи ижодкор билан оила қурган. У инсон ўта зиёли профессор эди. Онам иккинчи турмушидан Шуҳрат ва Шавкат исмли укаларимни дунёга келтирди. Афсуски, иккинчи турмуш ҳам омадли якунланмади.
«Онам иккинчи турмушидан ажрашганида тушкунликка тушиб қолганди»
Ажрим фарзандлар руҳиятига ёмон таъсир кўрсатади, аммо пешонада борини ўзгартириб бўлмайди. Ҳамиша Ўзбекистон халқ артисти Ёқуб Аҳмедовнинг фарзанди эканлигимдан фахрланаман. Аммо омадсиз икки турмушдан кейин онамга ҳам жуда қийин бўлганини эслайман. Мендан кўнгиллари тўқ бўлгани учунми билмадим, «Икки болани отасиз қандай катта қиламан?» деб тушкунликка тушиб қолганди. У моддиятни эмас, кўпроқ маънавий томон ҳақида ўйларди.
«Онам кинода фаолият юритишимни истамаган»
Ростини айтсам, буни мендан аввал онам истамаган. «Мен ўқимадим, сен ўқи», деб кўп айтарди. Аслини олганда онам олий маълумотли ижодкор эди. Онам ўқишимиз учун пул аямасди. Йил бошида қўлимга 100 сўм пулни бериб: «Истаган газета-журналингга обуна бўл», дерди. У пайтларда бу пулнинг қиймати анча катта эди, шу боис ўндан ортиқ газета-журналларга йиллик обуна бўлардим. Болалигимиз фақат ўқиш ва ўрганиш билан ўтди. Шу боисдан ҳам тарих факультетига ҳеч қандай қийинчиликларсиз ўқишга қабул қилинганман. Аммо 1995 йилда режиссёр Шавкат Жунайдуллаев «Чархпалак» сериалига таклиф этган. У йилларда хусусий тадбиркорлик билан шуғулланардим. Таклифни ўйлаб ўтирмасдан рад этганман. Аммо бир неча соатдан кейин отам қўнғироқ қилиб тезда театрга етиб келишимни сўраган. Борсам, хоналарида Шавкат Жунайдуллаев ўтирибди. «Бу режиссёр яхши сериал суратга олаяпти, сценарий маъноли, мен ҳам суратга тушаман, сенга ҳам роль бор» деган. Шу боис «Чархпалак» сериалидаги бойнинг ёрдамчиси ролини мажбуран қабул қилганман.
«Онам ҳамиша яхши ролларни кутиб яшарди»
Онам ҳақиқий ижодкор эди. Ҳамиша яхши ролларни кутиб яшарди. Бирор ролга ёки тадбирга таклиф этишса, алоҳида тайёргарлик билан бориши, ҳар нарсага эътиборли эканлига ҳайратимни оширарди. Онам сўнгги йилларда «Қайнона»дек (Озарбайжон фильми) кино олинса-ю, унда қўшиқ айтадиган қайнона ролини ижро этсам дерди. Афсуски, энди бу гаплардан фойда йўқ.
«Инсон тириклигида иззат-ҳурмат кўрсатиш керак»
Онамнинг ўлимларидан кўнгилни хира қиладиган воқеалар ҳам бўлди. Аввало, инсонга ўлмасидан аввал иззат-икром кўрсатиш керак. Айрим ташкилотлар ўша одам ўлмасидан аввал озгина эътибор беришганда эди… Биз билмаймиз, ўлимдан кейинги гаплар марҳумнинг қулоғига етиб бораяптими ёки йўқ. Қанийди, кўзлари очиқ, қулоқлари эшитиб турган пайтда бу гаплар айтилганда, инсон кўнгли кўтариларди. Онам тириклик чоғларида бир бор хабар олишмади, эътибор берилмади. Онамнинг ўлими ҳақида халққа расман хабар беришганида «Клара Жалилова 82 ёшида оламни тарк этди», дейишди ва бу билан нақадар эътиборсиз эканликларини кўрсатишди. Бу оддий арифметика — 1937 йил 8 июлда туғилган инсон бу йил 83 ёшни қаршилаган бўлади. Уларга Ўзбекистон халқ артисти Ёқуб Аҳмедов ва Ўзбекистонда хизмат кўрсатган артист Клара Жалилованинг ўғиллари Фурқат Аҳмедовни топиш муаммо эмасди. Ҳатто, Ўзбек миллий драма театри орқали ҳам мен билан алоқага чиқиш мумкин.
Изоҳ (0)