Ўзбекистонда талабларни бажармаган газ қуйиш шохобчалари ўчирилиши маълум қилинди
Ўзбекистонда Энергетика вазирлиги талабларини бажармаган газ қуйиш шохобчаларига газ етказиб бериш тўхтатилади. Бу ҳақда Беҳзод Норматов Zo‘rTV телеканалига берган интервьюсида айтиб ўтди.
«Биринчи навбатда аҳоли ва ижтимоий объектларга газни бир маромда етказиб беришни таъминлашимиз керак. Газ тизимидан интенсив равишда фойдаланадиган истеъмолчиларни биринчи навбатда ўчиришга мажбурмиз.
Автомобильларга газ компрессорлари орқали қуйиш шохобчаларини соат 17:00 дан 05:00 гача қисқартириш режалаштирилган. Бу орқали газнинг аҳолига етиб боришини таъминлашимиз зарур», — деди энергетика вазири ўринбосари.
Вазир ўринбосарининг айтишича, газ ҳажмини ўлчагичларни уланиш нуқтасига олиб чиқиши керак бўлган, лекин бу талабни бажармаган газ қуйиш шохобчаларга нисбатан қатъий чора кўрилади. Президент қароридаги пунктларни бажармаган газ қуйиш шохобчалари то талабларни бажармагунича ўчириб қўйилади.
Аввалроқ Бухорода аҳоли газ йўқлиги сабаб йўлни тўсиб қўйгани, Намангандаги газ-заправкада ҳайдовчилар навбат талашиб муштлашгани ҳамда Тошкентдаги метан заправкаларнинг ишлаш вақтига чеклов ўрнатилгани ҳақида хабар берилганди.
