Мутахассислар кунига 6 чой қошиқ шакар истеъмолини хавфсиз деб билади. Аммо баъзида умуман бошқа маҳсулотлар тановул қилинганда, унинг таркибида шакар борлиги хаёлга ҳам келмайди. Дўконлардан харид қилинган, буюртма берилган, ҳаттоки уйда тайёрланган таомларнинг кўпида шакар бўлиши мумкин. Албатта, шакарнинг мия фаолияти учун фойдали, шунингдек, энергия манбайи ҳисобланади. Аммо унинг миқдори мунтазам равишда ошириб борилса, қандли диабет каби хавфли касалликлар пайдо бўлиши мумкин. Ушбу касалликнинг олдини олиш учун эса ширинлик миқдорини қатъий назорат қилиш керак. Бунинг учун, албатта, қандай маҳсулот таркибида уларнинг қанча миқдори яширинганлигини билиш зарур.
Маҳсулот таркибида ёғ миқдори қанча кам бўлса, унинг таркибида шакар миқдори юқори бўлиш эҳтимоли мавжуд. Сабаби ишлаб чиқарувчилар томонидан маҳсулот таъмини яхшилаш ва кўпроқ маҳсулот сотилиши учун уларнинг таркибига кўп миқдорда шакар қўшилади. Натижада йогурт ва творог таркибида 10 фоизгача шакар ва ширин таъм берувчилар бўлади.
Тайёр соуслар
Кетчуп, соя соуси, чили – ушбу қўшимчалар ичидан топиладиган энг сўнгги нарса ҳам шакардир. Аммо у ҳар қандай соус рецептига киритилгани маълум. Масалан, бир ош қошиқ кетчупга камида бир чой қошиқ шакар қўшилади. Бу соуслардан воз кечиш керак дегани эмас, лекин унинг истеъмоли туфайли кунлик меъёрни ошиб кетиши мумкин.
Суши
Гуруч, балиқ, денгиз маҳсулотларида қандай қилиб шакар бўлиши мумкин? Гуруч пиширилганда, унинг янада мазали ҳамда эзилиб кетмаслиги учун унга анъанавий тарзда сирка, туз ва шакар қўшилади. Натижада бир ош қошиқ шакар бир стакан суши гуручи ичига яширинади. Балки бундан ҳам кўпроқ бўлиши мумкин.
Консерваланган мева ва сабзавотлар
Мева консервасида шакар бўлиши табиий, аммо сабзавотлар орасида энг машҳур ва севимли тузланган бодринг таркибидан шакарни қидириш мумкин. Шунингдек, маккажўхори, ловия, нўхат ва помидорда ҳам бир қанча миқдорда шакар яширинган.
Дон маҳсулотлари
Батон, ёрма, хамирли ширинликлар, ҳаттоки қотирилган нон таркибида ҳам шакар маҳсулоти яширинган. Ушбу маҳсулотларни сотиб олаётганда, уларнинг таркиби билан танишиб чиқиб, бунга ишонч ҳосил қилиш мумкин.
Нон
Барча учун фойдали бўлган қора нонлар таркибида кўп миқдорда шакар мавжуд. Ўртача 100 грамм нон учун камида 4 грамм шакардан фойдаланилади. Оқ нонлар таркибида эса бундан ҳам кўпроқ бўлиши кузатилган.
Гўшт маҳсулотлари
Айниқса, колбаса маҳсулотларининг ёрлиғиига назар ташланса, унинг таркибидан албатта, шакарни топиш мумкин. Кўпинча ярим тайёр гўшт маҳсулотларига ранг қўшиш учун фойдаланилади. Саломатлиги учун жиддий муносабатда бўладиганлар тайёр гўшт маҳсулотларидан бироз тийилиши тавсия этилади.
Томат маҳсулотлар
Улардан энг кўп фойдаланиладиганлари помидордан тайёрланган томат пасталаридир. Уларнинг таркибида шакар бўлиши аниқ, аммо қанча миқдорда бўлиши номаълум.
Мева шарбатлари
Шарбат қадоғида «шакарсиз» деб ёзилган бўлсада, унинг таркибига шакар қўшмасдан иложи йўқ. Ҳатто янги шарбат таркибида меваларга қараганда анча кўп шакар мавжуд. Бундан ташқари шарбатда глюкоза пайдо бўлишининг олдини олишга ёрдам берадиган тола мавжуд эмас, шунинг учун шарбатдаги шакар дарров қонга сингади.
Йогуртлар
Ҳамма йогуртлар ҳам фойдали эмас. Биргина кичкина қадоқдаги кам ёғли йогуртнинг таркибида 8 чой қошиқ шакар мавжуд. Шунинг учун шакарни соф ҳолда чеклаш билан у яшириниган маҳсулотларнинг истеъмоли ҳисобига организм бир кунда меъёридан ортиқ шакар қабул қилади. Натижада соғлиқ хавф остида қолиши шубҳасиз.
Изоҳ (0)