ЮНЕСКО Ижроия қўмитасининг 2 декабрь куни иш бошлаган 210-сессияси 2021 йилнинг 27 январига қадар давом этади, деб хабар бермоқда Ўзбекистон туризмни ривожлантириш давлат қўмитаси.
Қайд этилишича, тадбир ялпи мажлисида ЮНЕСКО бош директори Одри Азуле ташкилот фаолияти ҳақида сўз юритар экан, келгуси йил иккинчи муддатга эгаллаб турган лавозимига ўз номзодини илгари суриш истаги ҳақида расман эълон қилган.
ЮНЕСКОнинг Ўзбекистондаги миллий комиссияси раиси, бош вазир ўринбосари Азиз Абдуҳакимовнинг сўзларига кўра, ялпи мажлисда мамлакатнинг ЮНЕСКОдаги доимий ваколатхонаси раҳбари ҳам иштирок этиб, Ўзбекистон 2021 йилнинг ноябрь ойида бош конференция 41-сессияси доирасида бўлиб ўтадиган сайловда Одри Азуле номзодини қўллаб-қувватлашини маълум қилган.
Одри Азуле ташкилотни самарали ва профессионал тарзда бошқариб, халқаро ҳамжамиятни мураккаб дамларда, жумладан, бугунги пандемия шароитида ўзаро мулоқот, англашув ва тинчликни тарғиб қилиш орқали бирлаштира олгани алоҳида қайд этилган. Тадбир доирасида Ўзбекистоннинг ЮНЕСКОдаги вакили ташкилот тўғри йўлда экани ҳамда Ўзбекистон келгусида ҳам унинг шу йўсинда ривожланиши тарафдори эканини қўшимча қилган.
Хусусан, Азуле маърузасида илгари сурилган бутун дунёда таълим, илм-фан, технологиялар ва ахборот олиш кўламини яна-да кенгайтирувчи, шунингдек атроф-муҳит билан янада хавфсиз ва самарали мулоқот қилиш усулларини ишлаб чиқишни ҳамда инсоннинг асосий ҳуқуқларини тарғиб қилиш орқали адолатли ва тинчликсевар жамиятни яратишга доир саъй-ҳаракатларни қўллаб-қувватлашни назарда тутувчи стратегик мақсадлар сурилган таклифлари алоҳида эътироф этилган.
Тадбирда мамлакатнинг ноёб моддий ва номоддий маданий меросини тарғиб қилиш соҳасида Ўзбекистоннинг ташкилотга аъзо давлатлар ва ЮНЕСКО котибияти билан ҳамкорлик алоқаларини кенгайтиришга тайёр эканлиги қайд этилган.
Ўзбекистон вакили «Бахши санъати»ни Инсониятнинг номоддий маданий меросининг Репрезентатив рўйхатига киритиш ва «Ипак йўли: Зарафшон-Қорақум йўлаги» трансмиллий файлини Жаҳон мероси рўйхатига киритиш масаласида ҳамкорларнинг қўллаб-қувватлашига катта ишонч билдиришини таъкидлади.
Маълумот учун, бугунги кунга қадар ЮНЕСКОнинг Инсоният номоддий мероси репрезентатив рўйхатига «Шашмақом» ва Бойсун маданий муҳити (2008), катта ашула (2009), аския (2014), палов ва Наврўз байрами (2016), Хоразмнинг «Лазги» рақси (2019) киритилган эди. 2020 йилда «Насриддин Афанди латифалари»ни ЮНЕСКО маданий бойлиги рўйхатига киритиш таклиф қилинган.
Изоҳ (0)