Оқ уй ҳокимият Байденга тинч йўл билан топширилишига ишонч билдирди
АҚШнинг амалдаги президенти Дональд Трамп президент сайловларида ғолиб чиққан демократ Жо Байденга ҳокимиятни тинч йўл билан топширади. Бу ҳақда The Washington Post газетасига берган интервьюсида Оқ уй миллий иқтисодий кенгаши раҳбари Лоуренс Кадлоу маълум қилди, деб ёзади «РБК». «Ҳокимият тинч йўл билан топширилади, буни биламан», — деди у.
Унинг қўшимча қилишича, Американинг амалдаги раҳбари Жо Байденнинг инаугурацияси маросимида айнан нима билан машғул бўлишини тахмин қила олмайди. «Ҳаммаси Трампнинг ўзига боғлиқ», — дея аниқлик киритди Кадлоу.
Миллий иқтисодий кенгаш раҳбари айтишича, сайловларнинг дастлабки натижалари эълон қилинганидан кейин Трампнинг хатти-ҳаракатларида ғазабланиш белгиларини кўрмаган. Унинг фикрича, президент мамлакатдаги сайловлар ҳалол ҳамда алдовларсиз ўтишини эътибор билан кузатмоқда, холос.
Аввалроқ Axios нашри ўз манбасига таяниб, Трамп телетомошабинлар учун ўз президентлигининг «буюк финали»ни уюштиришни режалаштираётганини: у Вашингтонда янги давлат раҳбарини олқишламоқчи эмаслигини хабар қилган эди. Бунинг ўрнига, Трамп 20 январь — Байден президент лавозимига киришадиган куни Оқ уйни вертолётда тарк этиб, сўнг Air Force One (АҚШда бортида давлат раҳбари бўлган ҳар қандай самолёт шундай аталади) самолётида Флоридага жўнаб кетишни ва у ерда Байденга қарши митингда нутқ сўзлашни мўлжалламоқда. Шу тариқа, Трамп телетомошабинлар эътиборини ўз рақибининг президент лавозимига киришишига бағишланган маросимдан чалғитмоқчи, деб ёзади Axios. Флоридада Трамп 2024 йилги сайловларда қатнашиш ниятини эълон қилиши мумкин.
Дональд Трамп 3 ноябрда бўлиб ўтган сайловларда мағлуб бўлганини тан олмай, сайлов натижалари қалбакилаштирилганини даъво қилмоқда. У баъзи муҳим штатларда овоз бериш якунлари қайта кўриб чиқилишини талаб қилиб, бунинг учун 9 миллион доллар ҳам сарфлади. Аммо бюллетенларнинг қайта санаб чиқилиши Байденнинг ғалабасини кўрсатди. Судлар ҳам амалдаги президент жамоасининг овоз бериш ва бюллетенларни ҳисоблаш жараёнидаги қонун бузилишлари ҳақидаги даъволарини рад этди.
Декабрь бошида Трамп сайловлар ҳалол бўлган тақдирдагина мағлубиятини тан олишини билдирганди. «Мен сайловда мағлуб бўлишга қарши эмас, балки у адолатли бўлишини хоҳлайман. Истамайдиган нарсам шуки, сайловлар Америка халқидан ўғирлаб олинмасин», — деди Трамп.
Кейинроқ АҚШнинг амалдаги президенти Дональд Трамп 2024 йилда давлат раҳбари лавозимига ўз номзодини қўйиши мумкинлигини билдирди.
