AQShning amaldagi prezidenti Donald Tramp prezident saylovlarida g‘olib chiqqan demokrat Jo Baydenga hokimiyatni tinch yo‘l bilan topshiradi. Bu haqda The Washington Post gazetasiga bergan intervyusida Oq uy milliy iqtisodiy kengashi rahbari Lourens Kadlou ma’lum qildi, deb yozadi “RBK”. “Hokimiyat tinch yo‘l bilan topshiriladi, buni bilaman”, — dedi u.
Uning qo‘shimcha qilishicha, Amerikaning amaldagi rahbari Jo Baydenning inauguratsiyasi marosimida aynan nima bilan mashg‘ul bo‘lishini taxmin qila olmaydi. “Hammasi Trampning o‘ziga bog‘liq”, — deya aniqlik kiritdi Kadlou.
Milliy iqtisodiy kengash rahbari aytishicha, saylovlarning dastlabki natijalari e’lon qilinganidan keyin Trampning xatti-harakatlarida g‘azablanish belgilarini ko‘rmagan. Uning fikricha, prezident mamlakatdagi saylovlar halol hamda aldovlarsiz o‘tishini e’tibor bilan kuzatmoqda, xolos.
Avvalroq Axios nashri o‘z manbasiga tayanib, Tramp teletomoshabinlar uchun o‘z prezidentligining “buyuk finali”ni uyushtirishni rejalashtirayotganini: u Vashingtonda yangi davlat rahbarini olqishlamoqchi emasligini xabar qilgan edi. Buning o‘rniga, Tramp 20-yanvar — Bayden prezident lavozimiga kirishadigan kuni Oq uyni vertolyotda tark etib, so‘ng Air Force One (AQShda bortida davlat rahbari bo‘lgan har qanday samolyot shunday ataladi) samolyotida Floridaga jo‘nab ketishni va u yerda Baydenga qarshi mitingda nutq so‘zlashni mo‘ljallamoqda. Shu tariqa, Tramp teletomoshabinlar e’tiborini o‘z raqibining prezident lavozimiga kirishishiga bag‘ishlangan marosimdan chalg‘itmoqchi, deb yozadi Axios. Floridada Tramp 2024-yilgi saylovlarda qatnashish niyatini e’lon qilishi mumkin.
Donald Tramp 3-noyabrda bo‘lib o‘tgan saylovlarda mag‘lub bo‘lganini tan olmay, saylov natijalari qalbakilashtirilganini da’vo qilmoqda. U ba’zi muhim shtatlarda ovoz berish yakunlari qayta ko‘rib chiqilishini talab qilib, buning uchun 9 million dollar ham sarfladi. Ammo byulletenlarning qayta sanab chiqilishi Baydenning g‘alabasini ko‘rsatdi. Sudlar ham amaldagi prezident jamoasining ovoz berish va byulletenlarni hisoblash jarayonidagi qonun buzilishlari haqidagi da’volarini rad etdi.
Dekabr boshida Tramp saylovlar halol bo‘lgan taqdirdagina mag‘lubiyatini tan olishini bildirgandi. “Men saylovda mag‘lub bo‘lishga qarshi emas, balki u adolatli bo‘lishini xohlayman. Istamaydigan narsam shuki, saylovlar Amerika xalqidan o‘g‘irlab olinmasin”, — dedi Tramp.
Keyinroq AQShning amaldagi prezidenti Donald Tramp 2024-yilda davlat rahbari lavozimiga o‘z nomzodini qo‘yishi mumkinligini bildirdi.
Izoh (0)