Ҳиндистонда яратилган коронавирусга қарши вакциналар Ўзбекистон учун фойдали бўлиши мумкин. Бу ҳақда Ҳиндистоннинг Ўзбекистондаги элчиси Маниш Прабхат соғлиқни сақлаш вазири Абдуҳаким Хожибоев билан учрашувда маълум қилди.
Соғлиқни сақлаш вазирлигининг хабар беришича, вазир Абдуҳаким Хожибаев 7 декабрь куни Ҳиндистоннинг Ўзбекистондаги элчиси Маниш Прабхат билан учрашди. Мулоқот давомида сўнгги йилларда икки томонлама ҳамкорлик сифат жиҳатидан янги босқичга кўтарилгани таъкидланди.
Вазирлик хабарига кўра, элчи Ўзбекистон Президенти бошчилигида мамлакатда коронавирус инфекциясига қарши курашиш бўйича кўрилаётган чора-тадбирларни юқори баҳолади, шу сабабли касаллик тарқалиши ҳозирги вақтда сезиларли даражада камайганини эътироф этди. Ўз вақтида кўрилган чоралар COVID-19 оқибатларини минималлаштиришга сабаб бўлаётгани қайд этилди.
«Ўз навбатида, вазир ҳозирда вазиятнинг барқарорлиги хотиржамликка берилиш учун асос бўла олмаслигини айтди. Кўпгина бошқа мамлакатлар тажрибасига кўра, COVID-19’нинг иккинчи тўлқинидан қочиб бўлмайди, деган тушунча мавжуд. Бунинг учун мамлакатда унга тайёргарлик кўриш бўйича ишлар олиб борилмоқда», — дейилади ССВ хабарида.
Қайд этилишича, томонлар келгусидаги ҳамкорлик йўналишларини муҳокама қилди. Жумладан, мавжуд инвестиция лойиҳаларини ривожлантириш ва Ўзбекистонга янги инвесторларни жалб қилиш, қўшма фармацевтика ишлаб чиқариш объектларини ташкил этиш каби масалаларга тўхталиб ўтилди.
Маниш Прабхатнинг таъкидлашича, ҳозирги вақтда Ҳиндистон коронавирусга қарши учта вакцина яратиш устида иш олиб бормоқда, улардан иккитаси иккинчи, биттаси эса учинчи босқич синов жараёнида. Элчи келажакда Ўзбекистон аҳолиси учун ҳам ушбу ҳинд вакциналари фойдали бўлишини таъкидлаб ўтди.
Шунингдек, элчи талабалар алмашинуви дастури бўйича яқин ҳамкорликни йўлга қўйиш юзасидан таклифларини билдирди. Унинг таъкидлашича, Ҳиндистон ёшларининг Ўзбекистондаги тиббиёт олий ўқув юртларида ўқишга қизиқиши тобора ортиб бормоқда.
Эслатиб ўтамиз, соғлиқни сақлаш вазири Абдуҳаким Хожибоев 2020 йил охири ёки 2021 йил бошларида Ўзбекистон «Спутник V» вакцинасининг клиник синовларига киришишни мўлжаллаётганини маълум қилганди. Шунингдек, Ўзбекистон Россиянинг «Вектор» илмий маркази томонидан ишлаб чиқарилган «ЭпиВакКорона» вакцинаси рўйхатдан ўтказилгандан сўнг унинг қўшма синовларини ўтказишга қизиқиш билдирганди.
Бундан ташқари, Ўзбекистон Хитойнинг Ahnui Zhifei Longcom Biopharmaceutical вакцинасининг учинчи фаза клиник синовларини ўтказишга тайёрланмоқда. Инновацион ривожланиш вазирлиги маълумотларига кўра, уни 5 мингга яқин кўнгилли синовдан ўтказади.
Изоҳ (0)