Истеъмолчилар ҳуқуқларини ҳимоя қилиш агентлиги Beeline Uzbekistan мобил алоқа компанияси томонидан хизмат кўрсатиш қоидалари бузилиши бўйича иккита суд жараёнини ютиб чиқди. Энди компания абонентларига бир неча миллиард сўмлик зарар тўлаб берилади. Бу ҳақда агентлик матбуот хизмати хабар берди.
Ўзбекистон Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлиги 2020 йилнинг март ойида Beeline Uzbekistan компаниясига нисбатан «Истеъмолчиларнинг ҳуқуқларини ҳимоя қилиш тўғрисида»ги қонун ва Мобил алоқа хизматларини кўрсатиш қоидалари талаблари бузилиши белгилари бўйича иш қўзғатган.
Маълум бўлишича, 2019 йилнинг июль ойида Beeline Uzbekistan томонидан абонентларни «Хабардор бўл» хизматига бепул промо-даврга (10 ва 30 кунга) уланиши бўйича промо-акция ўтказилиши тўғрисида эълон берилган. Ушбу промо-акция мазкур хизматга уланмаган абонентлар учун мўлжалланган. Бироқ, бепул давр тугаши билан, (промо-акция шартларига кўра) ушбу хизмат автоматик равишда ўчирилмаган. Аксинча, ўрнатилган нарх бўйича кунлик 240 сўм миқдорида абонетларга хизмат ҳақи ҳисобланган.
Ушбу промо-акцияга умумий ҳисобда 3,2 миллиондан ортиқ абонент уланган бўлиб, улардан 1,2 миллионга яқини томонидан мазкур хизмат мустақил равишда ўчирилган. 2020 йилнинг май ойи ҳолатига ушбу хизмат деярли 1,3 миллион абонентда ёқилган ҳолатда бўлган.
Агентликнинг махсус комиссияси томонидан 2020 йил 3 июль санасида Beeline Uzbekistan’га нисбатан «Истеъмолчиларнинг ҳуқуқларини ҳимоя қилиш тўғрисида»ги қонуннинг 21-моддаси ҳамда Мобил алоқа хизматларини кўрсатиш қоидаларининг 25 ва 26-бандлари бузилиши юзасидан қарор қабул қилинди ва кўрсатма берилди.
Beeline Uzbekistan’га берилган кўрсатма промо-акцияни ўтказиш давомида «Хабардор бўл» хизматига бепул уланган ва акция тугаганидан сўнг автоматик равишда хизмат ўчирилмаган абонентларга мазкур хизматни ўчириш ва кўрилган зарарни қоплаш бўйича талаблардан иборат бўлган. Ҳар бир абонент ҳисобидан «Хабардор бўл» хизмати доирасида ортиқча ечилган маблағ унинг ҳисобига қайтарилиши билан қопланиши кўзда тутилган.
Агентлик томонидан маълум қилинишича, Beeline Uzbekistan ўзининг қонуний ҳуқуқларидан фойдаланган ҳолда, 2020 йилнинг август ойида Тошкент шаҳар Шайхонтоҳур туман маъмурий судига агентлик кўрсатмасини ҳақиқий эмас деб топиш тўғрисида мурожаат қилган. Натижада, суд Beeline Uzbekistan’нинг талабини рад этиш ва агентлик кўрсатмасини ўз кучида қолдириш бўйича қарор қабул қилди.
Бироқ, 2020 йилнинг октябрь ойида компания Тошкент шаҳар маъмурий судига аппеляция даъвоси билан қайта мурожаат қилди. Маъмурий суд ҳам агентликнинг кўрсатмасини ҳақиқий деб топиб, компания аппеляциясини рад этди.
Агентлик хабарига кўра, 2020 йилнинг 13 ноябрь куни Beeline Uzbekistan ўзининг www.beeline.uz расмий сайтида 26 ноябрдан бошлаб, 2019 йил промо-акция давомида акцияга уланган абонентларда «Хабардор бўл» хизмати ўчирилиши тўғрисида эълон қилди.
«Агентлик томонидан қўзғатилган иш бўйича 9 ой давом этган мунозара истеъмолчилар фойдасига ҳал этилди. Бугунги кунга келиб, Beeline Uzbekistan абонентларига етказилган зарар 20 миллиарддан ортиқ миқдорда баҳоланмоқда. Қувонарлиси, компания томонидан ушбу маблағлар абонентлар ҳисобига қайтарилиши бошланди», — дейилади хабарда.
Эслатиб ўтамиз, 2020 йилнинг май ойида Истеъмолчилар ҳуқуқларини ҳимоя қилиш агентлиги Beeline Uzbekistan мобил оператори томонидан «Ғолиб бўл ва ютиб ол!» акцияси бўйича сохта реклама орқали истеъмолчиларга нотўғри маълумот берганлиги учун «ViaMobi» МЧЖга қарши иш қўзғатганди.
Изоҳ (0)