Сергелида «мойка» ишчиси ўзига топширилган Nexia’ни йўлга ҳайдаб чиқиб, ЙТҲга учради

Тошкент шаҳар Сергели туманида 6 декабрь куни автомобиль ювиш шохобчаси ишчиси ювиш учун ўзига топширилган Nexia-3 автомобилини йўлга ҳайдаб чиқиб, Lacetti билан тўқнашув содир этди. Бу ҳақда Тошкент шаҳар ИИББ хабар берди.

Маълум бўлишича, 6 декабрь куни тахминан соат 22:40 да Давлатобод кўчасида 22 ёшли автомобиль ювиш шохобчаси ходими Абдулла Е. унга топширилган Nexia-3 автомобили калитидан фойдаланиб, автомобилда йўл қисмига чиққан. Натижада Nexia-3 Отабек Ж. бошқарувидаги Lacetti автомобилига тўқнашган. ЙТҲ сабабли ҳеч ким жабрланмаган. Тўқнашувга сабаб бўлган ҳолат ўрганилмоқда.

Тошкент шаҳар ИИББ ҳайдовчиларни нотаниш кишиларга автомобиль калитини топширмасликка чақирди.

Аввалроқ Фарғонада «мойка»дан ўзганинг Nexia машинасини миниб қочган шахс ушланганди, Андижонда эса «мойка» ишчиси раҳбарга тегишли Spark’ни олиб қочиб, юк машинасини бориб урганди.