Вазирлар Маҳкамасининг 2020 йил 2 декабрда «Тошкент шаҳрида Япония рақамли университетини ташкил этиш тўғрисида»ги қарори қабул қилинди.
Фото: «Дарё»
АКТ, дастурий таъминотни ишлаб чиқиш, ахборот тизими ва компьютер тармоқларини бошқариш бўйича олий маълумотли рақобатбардош кадрларни тайёрлаш ҳамда бошқалар университетнинг асосий вазифалари ва фаолият йўналишлари этиб белгиланди.
Қарорга мувофиқ, Тошкент шаҳридаги Япония рақамли университети нодавлат олий таълим муассасаси ҳисобланади.
Университетда ўқитиш Япониянинг Отемае университети, Токио онлайн университети ва бошқа нуфузли ОТМ ҳамда Ўзбекистон давлат таълим стандартлари талаблари инобатга олинган ва Олий ва ўрта махсус таълим вазирлиги билан келишилган ҳолда тасдиқланадиган ўқув режалари ҳамда фан дастурларига мувофиқ япон ва ўзбек тилларида тўлов-контракт асосида амалга оширилади.
Университетда бакалавриат таълим йўналишлари бўйича кундузги ва масофавий таълим шаклларида кадрлар тайёрланади. 2020/2021-ўқув йили ҳамда кейинги ўқув йилларида университетга қабул қилиш параметрлари Олий ва ўрта махсус таълим вазирлиги билан келишилган ҳолда белгиланади.
Мавзуга доир: 2021 йил учун дунё университетлари рейтинги эълон қилинди. Унда Ўзбекистондан бирорта ҳам ОТМ йўқ
Муҳандис-дастурчи бакалавриат таълим йўналиши бўйича университетга талабаларни қабул қилиш 2020/2021-ўқув йилидан, компьютер графикаси ва дизайн бакалавриат таълим йўналиши бўйича 2021/2022-ўқув йилидан бошлаб амалга оширилади.
Ҳар йили ижтимоий ҳимояга муҳтож оилаларнинг қобилиятли, иқтидорли ҳамда ўзлаштириш кўрсаткичлари юқори бўлган фарзандлари танлов асосида бепул (университет гранти асосида) 10 нафардан кам бўлмаган абитуриентлар ўқишга қабул қилинади.
Битирувчиларга олий таълим тўғрисидаги ҳужжат сифатида тан олинадиган Япония университетлари ҳамда Ўзбекистоннинг белгиланган намунадаги дипломлари берилади.
Университет Ўзбекистон давлат жаҳон тиллари университетининг Тошкент шаҳар Учтепа тумани Кичик ҳалқа йўли кўчаси 21-а уй манзилидаги 3-ўқув биносининг биринчи қаватига жойлаштирилади.
Аввалроқ Қорақалпоғистонда Ўзбекистон давлат консерваторияси филиали, Тошкентда электроника ва электротехника соҳасида мустақил ўқув юрти ҳамда Урганчда Малайзиянинг Binary университети филиали ташкил этилиши ҳақида хабар берилганди.
