Vazirlar Mahkamasining 2020-yil 2-dekabrda “Toshkent shahrida Yaponiya raqamli universitetini tashkil etish to‘g‘risida”gi qarori qabul qilindi.
AKT, dasturiy ta’minotni ishlab chiqish, axborot tizimi va kompyuter tarmoqlarini boshqarish bo‘yicha oliy ma’lumotli raqobatbardosh kadrlarni tayyorlash hamda boshqalar universitetning asosiy vazifalari va faoliyat yo‘nalishlari etib belgilandi.
Qarorga muvofiq, Toshkent shahridagi Yaponiya raqamli universiteti nodavlat oliy ta’lim muassasasi hisoblanadi.
Universitetda o‘qitish Yaponiyaning Otemaye universiteti, Tokio onlayn universiteti va boshqa nufuzli OTM hamda O‘zbekiston davlat ta’lim standartlari talablari inobatga olingan va Oliy va o‘rta maxsus ta’lim vazirligi bilan kelishilgan holda tasdiqlanadigan o‘quv rejalari hamda fan dasturlariga muvofiq yapon va o‘zbek tillarida to‘lov-kontrakt asosida amalga oshiriladi.
Universitetda bakalavriat ta’lim yo‘nalishlari bo‘yicha kunduzgi va masofaviy ta’lim shakllarida kadrlar tayyorlanadi. 2020/2021-o‘quv yili hamda keyingi o‘quv yillarida universitetga qabul qilish parametrlari Oliy va o‘rta maxsus ta’lim vazirligi bilan kelishilgan holda belgilanadi.
Mavzuga doir: 2021-yil uchun dunyo universitetlari reytingi e’lon qilindi. Unda O‘zbekistondan birorta ham OTM yo‘q
Har yili ijtimoiy himoyaga muhtoj oilalarning qobiliyatli, iqtidorli hamda o‘zlashtirish ko‘rsatkichlari yuqori bo‘lgan farzandlari tanlov asosida bepul (universitet granti asosida) 10 nafardan kam bo‘lmagan abituriyentlar o‘qishga qabul qilinadi.
Bitiruvchilarga oliy ta’lim to‘g‘risidagi hujjat sifatida tan olinadigan Yaponiya universitetlari hamda O‘zbekistonning belgilangan namunadagi diplomlari beriladi.
Universitet O‘zbekiston davlat jahon tillari universitetining Toshkent shahar Uchtepa tumani Kichik halqa yo‘li ko‘chasi 21-a uy manzilidagi 3-o‘quv binosining birinchi qavatiga joylashtiriladi.
Avvalroq Qoraqalpog‘istonda O‘zbekiston davlat konservatoriyasi filiali, Toshkentda elektronika va elektrotexnika sohasida mustaqil o‘quv yurti hamda Urganchda Malayziyaning Binary universiteti filiali tashkil etilishi haqida xabar berilgandi.
Izoh (0)