Тошкент тиббиёт академияси Фарғона филиали негизида Фарғона жамоат саломатлиги тиббиёт институти ташкил этилади. Президент Шавкат Мирзиёев 3 декабрь, пайшанба куни бу борадаги тегишли қарорни имзолади, деб хабар беради ЎзА. Фарғона вилояти юқумли касалликлар шифохонаси институтнинг клиник базаси этиб белгиланган.
Шунингдек, ҳужжатда қайд этилишича, қарор соғлиқни сақлаш, санитария-эпидемиологик осойишталик ва жамоат саломатлиги соҳасида юқори малакага эга олий маълумотли кадрларни тайёрлаш, ходимларни касбий ривожлантириш тизимини янада такомиллаштириш ҳамда тиббиёт ташкилотлари, шу жумладан, бирламчи тиббий-санитария ёрдами муассасаларини профессионал мутахассислар билан таъминлаш мақсадида қабул қилинган.
Институт соғлиқни сақлаш ҳамда санитария-эпидемиологик осойишталик ва жамоат саломатлиги муассасалари учун тор соҳадаги мутахассисликлар бўйича шифокорларни тайёрлаш билан шуғулланади.
Шунингдек, кадрлар етакчи хорижий тиббиёт олий таълим муассасалари билан ҳамкорликда малакали мутахассисларга эҳтиёж юқори бўлган соҳалар учун қўшма таълим ва академик мобиллик дастурлари асосида амалга оширилади.
Аввалроқ 2021/2022-ўқув йилидан бошлаб мавжуд эҳтиёждан келиб чиқиб Қарши давлат университети, Жиззах давлат педагогика институти, Навоий давлат педагогика институти, Гулистон давлат университетида тиббиёт факультетлари ташкил қилиниши тўғрисида хабар берилганди.
Изоҳ (0)