«Ҳакам учрашувни яхши бошқариб борган». ПФЛ «Нефтчи» — «Турон» учрашуви бўйича расмий баёнот берди

Профессионал футбол Лигаси (ПФЛ) «Нефтчи» — «Турон» учрашувида (0:1) юзага келган ҳолатлар бўйича расмий баёнот берди.

«Нефтчи» — «Турон» учрашуви якунида ҳакамларга нисбатан «Нефтчи» клуби футболчилари ҳамда мухлисларининг тажовузкор хатти-ҳаракатлари кузатилди, майдонда тартибсизлик вужудга келди. Ички ишлар органлари ходимларининг ҳаракатлари сабаб кўнгилсиз ҳолат тезда бартараф этилди.

Шу куни ҳакамлар гуруҳи ва умуман учрашувда бевосита иштирок этган шахсларнинг оғир тан жароҳати олиши ҳолати кузатилмади. 2 декабрь куни учрашув расмийлари ПФЛ вакиллари билан биргаликда Тошкентга қайтиб келди, айни вақтда уларнинг саломатликлари билан боғлиқ муаммолар йўқ.

2 декабрнинг ўзида ЎФА ҳакамлар ва назоратчилар бўлими экспертлари учрашувни ўрганиб чиқди. Унинг бурилиш нуқталари асосан уч вазиятда юз берган:

• 14-дақиқада бош ҳакам мезбонлар дарвозасига пенальти белгилади. Мазкур вазиятга ҳакам анчагина яқин бўлгани унинг ютуғи бўлди ва у ҳақли равишда 11 метрлик жарима зарбаси белгилади;
• 45-дақиқада тўп «Турон» футболчисининг қўлига теккандек туюлди, ўрганишлар шуни кўрсатдики, ҳакам жарима белгиламай, тўғри қарор қабул қилган. Сабаби тўп футболчининг тана қисмига теккан;
• 90-дақиқада тўп яна бир бор «Турон» футболчисининг қўлига теккандек туюлди. Такрорий лавҳа эса тўп футболчининг кўкрак ва елка қисмига текканини кўрсатди, қолаверса, бу эрда ҳимоячининг қўл табиий ҳолатда турганди. Ҳакамнинг бу қарори ҳам тўғри бўлди.

Шундан келиб чиқиб, учрашувни яхши бошқариб борган ҳакам 8.3 баллга лойиқ кўрилди, унинг ҳаракатлари яхши баҳоланди. ПФЛ беллашувдаги провокацион ҳаракатларга учмай, мураккаб ўйинни борича бошқариб борган ҳакамлар бригадасига ўз миннатдорчилигини билдиради. Шунингдек, ПФЛ мазкур ишни тегишли қўмиталарда ўрганиб чиқиш ҳамда айбдорларни жазолашни сўраб, ишни ЎФАга оширди.

1 декабрнинг ўзида ПФЛ расмийлари Фарғона вилояти ИИБ вакиллари билан мулоқотда бўлди ҳамда қонунчилик асосида уларни қизиқтирган барча саволларга жавоб қайтарди. Ўйиндан кейин ўзини нопрофессионалларча тутган мезбонлар вакиллари ва бунинг оқибатида тақиқланган ҳудудни кесиб ўтган футбол мухлислари билан вилоят ИИБ шуғулланмоқда. Айни вақтда ЎФА тегишли қўмитасида ҳам, ИИБда ҳам ишни ўрганиш учун етарлича далиллар мавжуд. ПФЛ футбол мухлисларидан бирор-бир қарор чиқаришда шошилмасликни илтимос қилади.

Айни кунларда ЎФА Этика қўмитаси ҳамда махсус инспекцияси ноҳалол ҳакамлик масаласини кўриб чиқишда давом этмоқда. Мана шундай вақтда ҳакамлар гуруҳи ҳам масъулиятни ҳис қилиб турибди. Жамоанинг ҳар қандай муваффақиятсизлигига фақатгина ҳакамлар айбдор бўлавермайди.

«Нефтчи» — «Турон» учрашувидаги ҳолат футболда кам учраса-да, аммо унинг бир қисми ҳисобланади. ИИБ ҳамда ЎФА тегишли қўмиталари ўз ваколатлари доирасида мазкур ишни ўрганиб чиқади ҳамда айбдор шахсларга нисбатан тегишли чоралар кўради.

ПФЛ, «Нефтчи» — «Турон» учрашувига оид расмий баёнот

Мазкур баҳсни ПФЛ раҳбарияти билан бир қаторда Фарғона вилояти ҳокими Хайрулла Бозоров ҳам стадиондан тўғридан-тўғри равишда кузатиб борган.

Ушбу воқеликлардан сўнг Профессионал футбол лигаси (ПФЛ) бош директори вазифасини бажарувчи Диёр Имомхўжаев юзага келган ҳолат Ўзбекистон футбол ассоциацияси томонидан алоҳида ўрганилишини маълум қилди.

Фарғона вилояти ички ишлар бошқармаси эса ўйиндан сўнг юз берган ҳолатлар ташкилот томонидан назоратга олинганини билдириб, барча ҳуқуқбузарлар ушланганини ва терговга қадар текширув ишлари олиб борилаётгани ҳақида баёнот берди.

Кейинчалик воқеага алоқадор беш киши 15 суткага қамалгани ва яна олти кишига нисбатан жиноят иши очилгани, улар орасида «Нефтчи»нинг икки футболчиси ҳам борлиги маълум бўлди.