Россиянинг Екатеринбург шаҳрида 1 декабрь куни бир гуруҳ ўзбекистонликлар бўлган Volkswagen Polo русумли енгил машина йўлнинг музлаган қисмида автоҳалокатга учраган, деб хабар бермоқда «Дунё».
Ўзбекистоннинг Екатеринбургдаги бош консулхонасининг маълум қилишича, бунинг оқибатида икки нафар ўзбекистонлик – 27 ёшли аёл ва беш ёшли бола ҳалок бўлган. Беш нафар киши оғир жароҳатлар билан шаҳарнинг 9-болалар ва 23-касалхоналарига ётқизилган. Ҳозир шифокорлар ўта оғир аҳволдаги машина ҳайдовчиси ва вафот этган боланинг онаси билан боғлиқ жарроҳлик амалиётларини ўтказмоқда.
Таъкидланишича, Ўзбекистон бош консулхонаси ва Ташқи меҳнат миграцияси агентлиги ваколатхонаси ходимлари юзага келаётган турли масалаларни жойида ҳал қилиш учун касалхоналарда бўлиб турибди.
Аввалроқ Қозондаги қурилишда 37 ёшли ўзбекистонлик ҳалок бўлгани, Россияда қийин аҳволга тушиб қолган 17 нафар ўзбекистонлик ватанга олиб келиниши ҳамда Россияда янги қурилаётган турар жой комплексида икки ўзбекистонлик ўртасидаги низо оқибатида ишчилардан бири ҳалок бўлгани ҳақида хабар берилганди.
Изоҳ (0)