Rossiyaning Sankt-Peterburg shahrida qurilishda ishlayotgan ikki o‘zbekistonlik o‘rtasida yuzaga kelgan nizo bir ishchining boshqa bir odamni pichoqlab o‘ldirishiga olib keldi. Bu haqda “78.ru” xabar tarqatgan.
Xabarga ko‘ra qotillik shahardagi Moskva tumanining Srednerogatskoy ko‘chasida qad rostlayotgan turar joy kompleksi hududida sodir bo‘lgan.
2020-yil 10-noyabr kuni mahalliy vaqt bilan 23:40 larda 46 yoshli O‘zbekiston fuqarosi spirtli ichimliklar ta’sirida, mast holatda o‘zi bilan birga maishat qilgan 41 yoshli o‘zbekistonlik sherigi bilan janjallashgan va uni pichoqlab qo‘ygan. Jabrlanuvchi vafot etgan.
Gumonlanuvchi qo‘lga olingan, pichoq ashyoviy dalil sifatida rasmiylashtirilgan. Qotillik yuzasidan jinoyat ishi ochilgan va gumonlanuvchi qamoqda saqlanmoqda.
Avval Rossiya 2016-yilda Istanbulda sodir etilgan qotillikda ayblanayotgan O‘zbekiston fuqarosini Turkiyaga topshirgani, Gruziyada xakerlik qilib, 3000 dollarga yaqin pulni o‘zlashtirgan O‘zbekiston fuqarosi qo‘lga olingani haqida xabarlar berilgan.