Ўзбекистонда ноябрь ойида истеъмол нархлари ва тарифларининг ўртача ойлик даражаси 1,5 фоизга ошди. Бу ҳақда Давлат статистика қўмитасининг ҳисоботида келтирилган. Январь—ноябрь ойларида истеъмол бозоридаги нархлар ва тарифлар ўртача 9,5 фоизга ошган.
Ноябрь ойида озиқ-овқат маҳсулотлари ўртача 2,4 фоизга, ноозиқ-овқат маҳсулотлари 0,9 фоизга, хизматлар эса 0,9 фоизга қимматлашган.
Ноябрь ойида озиқ-овқат маҳсулотлари орасида энг асосий ўсиш мева ва сабзавот маҳсулотлари орасида қайд этилган (7,8 фоиз). Ёғ-мой маҳсулотлари 3,3 фоизга, гўшт, парранда гўшти ва балиқ 1,5 фоизга, шакар, чой ва бошқа озиқ-овқат маҳсулотлари 1,5 фоизга, сут маҳсулотлари 1,2 фозига қимматлашган.
Умумий овқатланиш соҳасидаги нархлар эса ноябрь ойида 3,1 фоизга, алкоголь маҳсулотлари 1,1 фоизга, алкоголсиз ичимликлар эса 0,3 фоизга кўтарилган.
Ноябрь ойида ноозиқ-овқат маҳсулотлари орасида нархларнинг кўтарилиши бўйича етакчилик олдинги икки ойлардаги каби автомобиль ёқилғисига тегишли — ўртача 1,6 фоизга қимматлашган.
Йил ҳисоби бўйича нархлари кўтарилган ноозиқ-овқат маҳсулотлари қаторида етакчилик китоблар, газеталар, журналлар (14,5 фоиз), дори воситалари (13,4 фоиз), қурилиш материаллари (11,4 фоиз) ва тамаки маҳсулотларида (10,8 фоиз) кузатилган.
Ноябрь ойида тарифларнинг ўсишидаги етакчилик маиший хизматлар ва тиббий хизматларда қайд этилган — ой давомида 1,6 фоизга қимматлашган. Йил ҳисобида энг юқори ўсиш давлат боғчаларида (15,2 фоиз), маиший хизматларда (12,5 фоиз) ва йўловчи транспорти хизматларида (10,9 фоиз) қайд этилган.
Аввалроқ Марказий банк Ўзбекистонда келгуси ойларда нархларда қандай ўзгаришлар кузатилаётгани тўғрисидаги маълумотлар билан бўлишганди.
Изоҳ (0)