Ўзбекистон товар-хом ашё биржасида ўтган ҳафта давомида савдога чиқарилган Аи-80 маркали бензиннинг нархи 4,4 фоизгача ошди, дея хабар бермоқда биржа матбуот хизмати.
Ўтган ҳафтада Аи-80 маркали автомобиль бензинининг ўртача кунлик нархи бир тонна учун 5 миллион 325 минг 100 сўмдан 5 миллион 557 минг 100 сўмгача ёки 4,4 фоизга кўтарилган.
Қайд этилишича, кўриб чиқилаётган даврда бир тонна Аи-80 русумли автомобиль бензинининг ўртача ҳафталик котировкаси 5 миллион 476 минг 800 сўмни, Аи-91 — 6 миллион 203 минг 900 сўмни ташкил этди.
Шунингдек, ўтган ҳафта давомида биржа савдоларига 24 338 тонна Аи-80 маркали автомобиль бензини қўйилди ва улардан 20 273,3 тоннаси, яъни 83,3 фоизи сотилган. Ўтказилган савдоларда ҳар куни ўртача 52 нафар харидор иштирок этган.
Маълумот учун, автомобилларга ёқилғи қуйиш шохобчаларида Аи-80 русумли бензин бир ой аввал 4100 сўмдан 4500 сўмгача нархда сотилаётган эди. Кейинчалик унинг нархи 4500 сўмдан 4800 сўмгача кўтарилди. Ҳозирда Тошкентдаги автомобилларга ёнилғи қуйиш шохобчаларида Аи-80 бензинининг бир литри ўртача 4600 сўмдан 5000 сўмгача сотилмоқда.
Эслатиб ўтамиз, 2020 йил 1 майдан бошлаб Аи-80 маркали автомобиль бензини ва дизель ёқилғиси (шу жумладан, ЭКО маркали дизель ёқилғиси) чакана нархларини давлат томонидан тартибга солиш бекор қилинди. Шундан сўнг, 1 майдан дизель ёқилғиси нархи 500 сўмга пасайиб, 6500 сўм қилиб белгиланган. 3 майдан бошлаб эса Аи-80 бензинининг нархи 500 сўмга пасайиб, бир литри 4000 сўмдан сотила бошлаган.
Бундан ташқари, «Ўзбекнефтгаз» компаниясининг UNG бренди остидаги автомобилларга ёнилғи қуйиш шохобчаларида 13 апрелдан бошлаб Аи-91 маркасидаги бензиннинг бир литри нархи 5800 сўмдан 5600 сўмгача пасайтирилган. Шунингдек, дизель нархи 1 мартдан бошлаб 7500 сўмдан 7300 сўмга пасайтирилган, 3 апрелдан бошлаб эса дизель нархи яна 300 сўмга арзонлаштирилган ҳолда сотувга чиқарилганди.
Изоҳ (0)