«Дарё» фотосаёҳати: Туркиянинг Истанбул шаҳридаги Тақсим майдони ва Истиқлол кўчаси манзаралари

«Пандемия шароитида туризм» лойиҳасини ташкил этган Туркия маданият ва туризм агентлиги ўзбекистонлик журналист ва блогерларни Туркиянинг Истанбул ва Анталия шаҳарларига таклиф этгани ҳақида хабар берган эдик. Сафар дастурига мувофиқ Истанбулнинг диққатга сазовор жойларини зиёрат қилиш режалаштирилган. Ана шундай жойлар сирасига Тақсим майдони ва машҳур Истиқлол кўчасини ҳам қўшиш мумкин.

Истанбулнинг марказий қисмидаги Тақсим майдони Тақсим микротумани ва Бейўғли туманида жойлашган. Майдон нафақат маҳаллий аҳоли, балки сайёҳлар учун энг ташрифбоп саналади. Номи араб тилидаги «тақсимот» сўзидан олинган. Бу ерда авваллари турли тадбирлар, Янги йил байрами, намойиш ва митинглар ўтказилган. Бироқ 2013 йилда майдон ёнидаги Тақсим-Гези боғи ўрнида қурилиши режалаштирилган савдо маркази туфайли дарахтлар кесилишига қарши ўтказилган намойишларда намойишчилар ҳамда полиция тўқнашуви мамлакат бўйлаб турли норозиликларга сабаб бўлгани учун кейинчалик бу ерда тадбирлар чекланди. Савдо маркази лойиҳаси эса музлатиб қўйилган. Ҳудуднинг ўзига хос жиҳати шундаки, бу ерда эски ва янги кварталларнинг чегараси жой олганини кўриш мумкин.

Майдон шарқида 1957 йилда муҳандис Ҳаёти Табанлиўғли томонидан қурилган Отатурк маданият саройи ўрин олган. Унинг ёнида Кумушсуй кўчаси, Германия ҳамда Япония элчихоналари мавжуд. Ҳудудда, шунингдек, XIX асрга оид кўплаб бинолар: техника университети, ҳарбий госпитал ва 2008 йилдан бери санъат галереяси тушган сув тақсимлаш маркази ўрин олган. Шимоли-шарқий томонда Тақсим-Гези боғи бор. Майдоннинг энг машҳур ҳудудларидан бири бу Истиқлол кўчасидир. Унда кўнгилочар масканлар, дўконлар, ресторанлар, театрлар, меҳмонхоналар, бутиклар, эсдалик совғалари расталари, санъат галереялари ҳамда клублар жой олган.

Тақсим майдонининг ғарбий томонида 1928 йилда Петро Каноник томонидан ишланган «Республика» ҳайкалини кўриш мумкин. Ушбу санъат намунасининг ўзига хос жиҳати шундаки, унинг шимолга қараган томонида Мустафо Камол Отатуркнинг республика ўрнатилгунига қадар бўлган курашларидаги ҳолати, қарама-қарши томонидан эса ҳамкасблари билан биргаликда турган қиёфасини учратасиз. Бу билан ҳайкалтарош миллий қаҳрамоннинг бир вақтнинг ўзида 2 турли даврларга мансублигини акс эттирмоқчи бўлган.

• Трамвай «Истиқлол» кўчасидаги ягона жамоат транспорти саналади;
• Тарихий трамвай линияси Истанбулнинг бошқа жамоат транспортларига алоқадор эмас. Бироқ умумий рақамлаштиришга қўшилган, унинг тартиб рақами Т4;
• Йўналишнинг умумий узунлиги 1,6 километрни ташкил этиб, 5 та бекатга эга: Тақсим-Камии оға-Галатасарой-Одакўл-Тунел;
• Трамвайнинг ўртача тезлиги секин ҳаракатланаётган велосипедчини эслатади;
• Йўналишда 2 та трамвай ҳаракатланади;
• Уларнинг ичида ҳар икки ёнида 6 тадан жами 12 та ўриндиқ бор;
• Йўлкирани нақд пул ёки карта орқали тўлаш мумкин, чунки унда замонавий электрон тўлов тизими бор;
• Трамвай 1990 йилда ишга тушган.