Бармоқ изи ёки юз сканери эмас: Samsung Galaxy S21 овоз ёрдамида блокдан чиқарилади

Samsung’нинг янги флагманларида қурилмани қисқа жумлалар орқали блокдан чиқариш имконияти пайдо бўлади, деб хабар беради Hi-Tech.Mail.ru.

Ҳозирги кунда кўпчилик смартфонни бармоқ изи сканери ёки юз орқали тезда блокдан чиқаришга ўрганиб қолган. Samsung эса ушбу функцияни янги биометрик аутентификация усули орқали кенгайтиришни истамоқда — Galaxy S21’ни овоз ёрдамида блокдан чиқариш мумкин бўлади.

Замонавий смартфонлар одамлар овозини ажрата олади, бу 2013 йили Моtо Х’да пайдо бўлганди — унга нутқни ажрата оладиган алоҳида чип ўрнатилган. Samsung ушбу технология ёрдамида фойдаланувчилар ўз смартфонларини қисқа жумлалар орқали очишига имконият яратмоқчи.

Қурилмани блокдан чиқаришнинг бу каби усули, масалан, машинада — смартфон бирор жойга ўрнатилган бўлса, фойда беради. Бироқ иккинчи масала — бу иш амалга оширилганидан сўнг барибир экранга қўл билан тегиш керак бўлади.

«Эҳтимол, Samsung смартфонни овоз ёрдамида бошқаришнинг кўпроқ имкониятларини кўриб чиқаётгандир, шунда ушбу фикрдан қандайдир маъно бўлади», — дейилади хабарда.

Samsung тақдимотда жавоб бериши керак бўладиган яна бир савол — технологиянинг қанчалик хавфсизлиги. Замонавий нейротармоқлар одамлар овозини яратиш имкониятини беради. Компания ўз қурилмаларини бундан ҳимоялай олиш-олмаслиги ҳозирча номаълум.

Аввалроқ Samsung Galaxy S21 флагмани қутисидан симсиз наушниклар ўрин олиши мумкинлиги тўғрисида хабар берилганди.