Xiaomi компанияси Redmi Note9 Pro 5G’ни тақдим этди: 108 мегапикселли камера ва 120 герцли экран

Xiaomi компанияси ўзининг учта янги смартфонини — Redmi Note9 Pro 5G, Note9 5G ва Note9 4G’ни тақдим этди, деб хабар беради Hi-Tech.Mail.ru.

Redmi Note9 Pro ҳозирда савдода бўлганига қарамай, худди шу номдаги янги смартфон 5G алоқа тармоғини қўллаб-қувватлагани сабаб ундан фарқ қилади. У камера ва қопқоқ қисмида ранглар уйғунлиги билан янгиланган дизайнга эга бўлган. Бармоқ изи сканери ён тарафга жойлаштирилган.

Redmi Note9 Pro’га 5G Full HD+ сифатли ҳамда 120 герсли янгиланувчи частотага эга 6,67 дюймли дисплей ўрнатилган. Компания унинг ёруғлиги устида анча меҳнат қилган бўлиб, қоронғида қулай ўқиш учун уни 1 нитга қадар тушириш мумкин. Корпус IP53 стандарти бўйича ҳимояланган — сувга тушириш мумкин эмас, бироқ ёмғирдан ҳимояланган.

Асосий ўзига хослиги 108 мегапикселга тенг янги авлод Samsung HM2 сенсори ҳисобланади. Бундан олдинги HM1, масалан, Samsung Galaxy S20 Ultra флагманига ўрнатилган. Xiaomi’нинг смартфони эса ундан беш баробар арзон. Қолган камералари — 8 мегапикселли кенг бурчакли, шунингдек, 2 мегапикселли макро суратга олиш ва чуқурликни ўлчовчи датчик.

Смартфон Snapdragon 750G базасида ишлайди ва 5G алоқа тармоғини қўллаб-қувватлайди. Аккумулятор сиғими — 4820 мА/соат, 33 ваттли тезкор қувватланиш функциясига эга. Корпусида USB Type-C ва наушниклар учун 3,5 миллиметрли разём бор.

Тезкор хотираси 6 Гб, ички хотираси эса 128 гигабайт бўлган модель нархи — 1599 юань (242 доллар).

Redmi Note9 5G дизайни ҳам ўзидан катта моделники каби, бироқ бироз соддароқ. Экрани 6,53 дюйм ва 60 герцли стандарт янгиланиш частотасига эга. Камералар жамланмаси ҳам оддий — асосий модул 48 мегапиксел. Шунингдек, у MediaTek Dimensity 800U процессорида ишлайди, аккумулятор сиғими — 5000 мА/соат. 6/128 гигабайтли версия нархи — 1299 юань (197 доллар).

Шунингдек, линейкадан 999 юанли (150 доллар) ҳамёнбоп Redmi Note9 4G ҳам ўрин олган. Унинг дизайни бироз бошқача, хотираси камроқ ва процессори кучсиз. Шунга қарамай, 48 мегапикселли камерага эга, аккумулятор сиғими эса ошган — 6000 мА/соат.

Аввалроқ Xiaomi компанияси Redmi Note 9 тақдимотининг таклифномаси билан бирга темир ханжар ҳам совға қилаётгани тўғрисида хабар берилганди.