Буюк Британиянинг Times Higher Education (THE) нашри дунёнинг 200 та энг яхши университетлари рейтингини эълон қилди.
Ушбу рейтинг 2010 йилда ишлаб чиқилган бўлиб, университетларни баҳоловчи дунёдаги нуфузли рейтинглардан бири ҳисобланади.
Университетларнинг муваффақияти даражаси уларнинг фаолиятини статистик таҳлил қилиш, маълумотларни текшириш, шунингдек, халқаро академик ҳамжамият вакиллари ва иш берувчиларнинг йиллик глобал экспертлик сўровномалари натижалари асосида баҳоланади.
Сўровлар давомида мутахассислар олти мингта таълим муассасалари орасидан уларнинг фикрича фақат энг яхши олий ўқув юртларини, шунингдек, ўқишни магистратура ва докторантура даражаларида давом эттириш учун энг кучли бўлган университетларни танлайди.
Олий ўқув юртлари фаолияти таҳлили 13 кўрсаткичдан иборат. Уларни асосий баҳолаш мезонлари қуйидагилар:
- талабалар ва ўқитувчилар халқаро ҳаракатчанлиги;
- халқаро стипендия дастурлари сони;
- илмий тадқиқотлар даражаси;
- инновацияга ҳисса қўшиш;
- илмий мақолаларидан манбалар олиш;
- таълим хизматларининг даражаси ва бошқалар.
Унда қаторасига тўрт йилдан буён Оксфорд университети етакчилик қилмоқда. Собиқ Совет Иттифоқи мамлакатлари орасида фақатгина Ломоносов номидаги Москва давлат университети рейтингдан жой олган бўлиб, у 174-ўринда. Ўзбекистондан эса бирорта олий ўқув юрти жой олмаган.
Рейтингда кучли ўнталик қуйидагича:
- Оксфорд университети;
- Стэнфорд университети;
- Гарвард университети;
- Калифорния технология институти;
- Массачусетс технология институти;
- Кембриж университети;
- Калифорния университети, Беркли;
- Йель университети;
- Принстон университети;
- Чикаго университети.
Изоҳ (0)