Швеция шаҳзодаси Карл Филипп ҳамда унинг турмуш ўртоғи малика Софияда коронавирус инфекцияси аниқланди. Бу ҳақда қироллик саройи баёнотига таяниб, «Интерфакс» хабар берди.
Маълумотларга кўра, 41 ёшли шаҳзода ва унинг 35 ёшли турмуш ўртоғида касалликнинг енгил белгилари кузатилмоқда — худди гриппдагидек. Оила икки нафар ёш боласи билан Стокгольмдаги уйида даволанмоқда.
Таъкидланишича, яқин вақтлар ичида Швеция қироли Карл XVI Густав, қиролича Сильвия, шунингдек, малика Виктория, уларнинг қизи ҳамда Карл Филиппнинг синглиси ва унинг турмуш ўртоғи Даниэль ҳам коронавирусга тест топширади.
Aftonbladet таблоидининг маълумотларига кўра, қироллик оиласи ўтган ҳафта қиролича Сильвиянинг дафн маросимида тўпланган, бунга қадар маросим иштирокчилари коронавирусга тест топширган ва барчанинг натижаси салбий чиққан эди.
Пандемия бошида малика Софияда коронавирусга чалинганларни даволовчи Стокгольмдаги касалхоналардан бирига волонтёр сифатида ишга жойлашган эди. Яқин вақтгача у ерда ярим ставкада ишлаб келаётганди.
Аввалроқ коронавирус юқтирган одам билан мулоқотда бўлган Испания қироли карантинга олингани тўғрисида хабар берилганди.
Эслатиб ўтамиз, Швеция дунёда коронавирусга қарши кураш учун карантин жорий қилмаган кам сонли давлатлардан бири ҳисобланади. Мамлакат бош эпидемиологи Андерс Тегнелл карантиндан воз кечилгани сабабли мамлакатда жуда кўп одам вафот этганини тан олганди ва буни хато деб атаганди. У мамлакат ўз сиёсатини қайта кўриб чиқиши ва кескинроқ карантин чораларини кўриши кераклигини маълум қилган.
Изоҳ (0)