Ўзбекистонда мораторий даврида 7854 туп дарахт ноқонуний кесилиб, табиатга 9,7 млрд сўмдан ортиқ зарар етказилган

Экология ва атроф-муҳитни муҳофаза қилиш давлат қўмитаси томонидан 24 ноябрь куни дарахтлар ва буталар қимматбаҳо навлари кесилишининг олдини олиш бўйича мораторий даврида амалга оширилаётган ишларга бағишланган матбуот анжумани ўтказилди, дея хабар бермоқда «Gazeta.uz».

Қўмита раисининг биринчи ўринбосари Нарзулла Обломурадов мораторий мобайнида табиатга 9 миллиард 787 миллион 200 минг сўм миқдорида зарар етказилганини қайд этган.

«Мораторий эълон қилингач, 20 ноябрь ҳолатига кўра, экологик тадбирлар натижасида 3897 та қонунбузарлик аниқланган. Уларда 4 миллиард 316 миллион сўмдан ортиқ жарима белгиланган. Шундан 2 миллиард 757 миллион 400 минг сўм ундирилди. Мазкур ҳолатлар юзасидан табиатга етказилган зарар миқдори 9 миллиард 787 миллион 200 минг сўмни ташкил этган ва шундан, 2 миллиард 942 миллион 400 минг сўми ундирилди», — дея таъкидлади Нарзулла Обломурадов.

Таъкидланишича, табиатга етказилган зарарни ундириш мақсадида 338 та ҳолат бўйича (6 миллиард 913 миллион 100 минг сўм) тўпланган ҳужжатлар суд, прокуратура, МИБ, ИИБга киритилган. 17 та ҳолат бўйича қонунбузарлик содир этган шахсларга жиноий иш қўзғатилган. Ҳуқуқбузарлардан 121 та иш асбоби ашёвий далил сифатида олиб қўйилган.

Аниқланган ҳуқуқбузарликлар натижасида жами 2298 метр куб бута, 7854 туп дарахт, шундан 3307 дона қимматли ва 4547 дона кам қимматли дарахтлар ноқонуний равишда кесилган. Ҳуқуқбузарликларнинг 167 таси мансабдор шахслар томонидан содир этилган.

Хусусан, Сирдарё тумани ҳокимининг ўринбосари 11,7 миллион сўм ҳамда Яккасарой туманида Вуилдиниг анд Супплиэс қурилиш корхонаси томонидан 81 туп дарахтлар кесилганлиги натижасида 630,4 миллион сўм миқдорида табиатга зарар етказилган.

Анжуманда қайд этилишича, мораторий даврида жисмоний ва юридик шахслардан жами 4018 та мурожаат келиб тушган. Уларда 188 943 туп давлат ўрмон фондига кирмайдиган дарахт ва буталарнинг кесилишига рухсат сўралган. Қўмита вакили жами 134 232 туп (71 фоиз) дарахт ва буталарнинг кесилишига, шундан 65 105 туп шарқ чинори, эман, Қрим қарағайи, чинорсимон заранг, элдор қарағайи, каштан, шумтол, туранғил ва бошқа 20 турдан ортиқ қимматбаҳо дарахт ва буталарнинг кесилишига рад жавоби берилганини айтди.

Аввалроқ Давлат экология қўмитаси мораторий муддатини 2021 йил 31 декабрга қадар узайтириш бўйича Вазирлар Маҳкамасига таклиф киритгани хабар қилинганди.