Қашқадарё вилоят халқ таълими бошқармасининг собиқ бошлиғи Фарҳод Очилов Президент Шавкат Мирзиёевга маъқул келмаган ва шу сабаб билан ишдан олинган. Бу ҳақда халқ таълими вазири Шерзод Шерматов маълум қилди дея хабар берди «Дарё» мухбири.
Шерзод Шерматов.
Фото: «Дарё»
2020 йил 25 ноябрь куни вазир Шерзод Шерматов иштирокидаги йиғилишда вилоят халқ таълими бошқармасига янги раҳбар тайинланиши баробарида собиқ раҳбарнинг ишдан олиниш сабаби ҳам очиқланган.
«Вилоят бошқармасига қўйилган янги раҳбар қуруқ ва баландпарвоз гаплар гапириб, давлатимиз раҳбарининг ҳам кўнглини хира қилди. Ўтган сафар ҳаммани йиғиб бу ҳақда гаплашиб олгандик. Шу сабаб давлатимиз раҳбари бу масалада норози бўлиб, бунақада Қашқадарё таълимини кўтаролмаймиз, ўзи шундоғам вилоят республикада энг охирги ўринларда, деганди», — деди вазир.
Шерзод Шерматовнинг қўшимча қилишича, Президент Шавкат Мирзиёев 2020 йилнинг 12—13 ноябрь кунлари вилоятга ташрифи чоғида Қашқадарёда таълим сифати ёмонлигини айтиб, кадрлар танлашдаги хатоликлар ҳақида гапирган.
Фарҳод Очилов.
Фото: Қашқадарё вилоят ҳокимлиги
«Вилоят халқ таълими тизимини текшириш учун аудит текширув ташлаганимизда қанча муаммолар борлиги маълум бўлди. Президентимиз муаммолар жуда кўп. Шу муаммоларни ким ечиб беради, вилоятнинг жонкуяр кадри. Шунинг учун яхши кадр қўйинглар, керак бўлса, ҳокимни олиб, бу ёққа қўйинглар, бу муҳим масала, деганди», — дейди вазир Шерматов.
Эслатиб ўтамиз, Шерзод Шерматов иштирокидаги йиғилишда Қашқадарё вилоят халқ таълими бошқармасига айни кунга қадар Шаҳрисабз шаҳрини бошқариб келган Тўлқин Каримов тайинлангани ҳақида хабар берилганди.
