Бугун,

  • USD 11014.01
  • RUB 191.8
  • EUR 10674.78

АҚШнинг сайланган президенти Жо Байден Давлат департаменти раҳбарлик лавозимига ўзининг маслаҳатчиси Энтони Блинкенни тайинлаш ниятида. Бу ҳақда Bloomberg ўзининг учта манбасига таяниб хабар берди. Шунингдек, The New York Times, Reuters ва CNN ҳам бу ҳақида ёзган.

Фото: Reuters

Фото: Reuters

58 ёшли Энтони Блинкен — Байденнинг эски ҳамфикрларидан бири бўлиб, у билан салкам 20 йилдан буён ҳамкорлик қилиб келади. Бунга қадар Блинкен Билл Клинтоннинг спичрайтерларидан бири бўлган ва Барак Обама даврида давлат котиби ўринбосари лавозимида ишлаган. Обама даврида Блинкен АҚШ ташқи сиёсатининг шаклланишида муҳим рол ўйнаган, хусусан, 2014 йилда Қримнинг Россияга қўшилишига жавоб танланишида ҳам.

Шунингдек, Байден президентнинг миллий хавфсизлик масалалари бўйича ёрдамчиси лавозимига ўз номзодини аниқлаб олган. Ушбу лавозимга бунга қадар Ҳиллари Клинтоннинг маслаҳатчиси бўлган Жейк Салливан илгари сурилади.

Байден АҚШнинг БМТдаги доимий вакили лавозимига Линда Томос-Гринфилд номзодини илгари суради. У Африка масалалари бўйича мутахассис ҳисобланади ва Обама даврида давлат котиби ёрдамчиси бўйича ишлаган.

Учала номзоднинг ҳам расмий эълон қилиниши 24 ноябрь санасига мўлжалланган.

Маълумот учун, 2018 йилда Рекс Тиллерсон АҚШ давлат котиби лавозимидан бўшатилган ва Трампнинг тавсиясига кўра, МРБ директори Майк Помпео ушбу лавозимни эгаллаган.

Эслатиб ўтамиз, АҚШда президентлик сайлови 2020 йилнинг 3 ноябрь куни бўлиб ўтди, овозлар бир неча кун давомида ҳисоблаб чиқилди, 7 ноябрь куни АҚШнинг йирик ОАВлари сайловда Байден ғалаба қозонганини маълум қилди. Дональд Трамп эса мағлубиятни тан олмади ва сайлов бўйича судга мурожаат қилишини билдирди. У сайловлар қонунбузарликлар билан ўтган деган фикрда, шунингдек, сайловларда мамлакат конституцияси бузилганини айтган.

Пенсильвания суди Трампнинг Филаделфиядаги сайловларида қонун бузилишлари қайд этилгани бўйича даъвосини рад этди. Кейинроқ Байден ҳокимиятни топширишдан бош тортаётган Трамп маъмуриятини судга бериши мумкинлигини билдирди.

Изоҳ
Асосий янгиликлар