Электр энергиясиз қолган Приморск ўлкасининг аҳолиси ўз электромобилларидан телефонлар ва маиший техника учун қувват манбайи сифатида фойдаланмоқда, дея хабар қилмоқда «Интерфакс».
«RusHidro автомобиль қувватловчи станциялари тармоғининг оғир об-ҳаво шароитида ишлаши ўтган ҳафта 900 га яқин электр транспорт воситасининг аккумуляторларини зарядлаш имкониятини берди. Уларнинг эгалари уйга етиб бориб, электромобил ёрдамида маиший техника, иситкич, ноутбук ва мобил телефонларни қувватлади», – дейилади компания баёнотида.
Мутахассисларнинг фикрига кўра, электромобил аккумуляторининг қуввати 6-8 соатгача бўлган муддатда уйнинг минимал эҳтиёжларини қондириши мумкин.
«Минтақага ёпирилган циклондан сўнг, RusHidro электр қувватлаш шохобчаларида фуқаролардан тўловларни олиш тўхтатилди. Приморск ўлкасида ўрнатилган RusHidro’нинг ўнта электр зарядлаш станцияларининг исталган бирида электромобил эгалари ўз транспорт воситаларини бепул заряд қилишлари мумкин», – дейилади хабарда.
Таъкидланишича, электромобилларни қайта қувватлаш атиги бир неча дақиқа вақтни олади, тўлиқ қувватлаш эса ярим соатдан кам вақт ичида амалга оширилади.Россия Энергетика вазирлигининг маълумотларига кўра, 23 ноябрь куни ҳам Владивосток ва Артем каби 39 та аҳоли пунктларида 78 мингга яқин маиший истеъмолчилар электр энергиясиз қолмоқда.
Маълумот учун, 19 ноябрь, пайшанба куни тунда Приморск ўлкасига циклон урилган. Ёмғир, қор ва кучли шамол энергия ва иссиқлик тизими билан боғлиқ аварияларни келтириб чиқарди, интернет алоқа каналларига зарар етказди ҳамда жамоат транспорти ҳаракати тўхтади. Ўлкада минтақавий даражада фавқулодда вазият ҳолати амал қилмоқда.
Минтақанинг кўплаб аҳолиси уйларида сув ёки иситиш тизимидан маҳрум бўлган. Айни пайтда циклон Приморскни тарк этган. Қайта тиклаш ишлари давом этмоқда.
Изоҳ (0)