Қўлбола бомба макетлари, қотилликлар квести, ноодатий дарслар. Бош прокуратура академиясидан фоторепортаж

23 ноябрь куни Ўзбекистон Республикаси Бош прокуратураси академиясида оммавий ахборот воситалари ва блогерлар учун муассаса раҳбари Евгений Коленко бошчилигида пресс-тур ташкил этилди. Пресс-тур академия фаолиятига оид 10 дақиқалик видеолавҳа билан бошланди. Шундан сўнг Евгений Коленко ўқув муассасасининг тарихи, вужудга келиш босқичлари, ўқув жараёнларининг ўзига хос жиҳатлари ҳақида гапириб берди.

2018 йилда Бош прокуратура олий ўқув курсларидан академия этиб қайта ташкил этилган таълим даргоҳида ўтган даврда 6 000 нафарга яқин ҳуқуқни муҳофаза қилиш органлари ва давлат хизматчилари академияда таҳсил олган. 2019/2020-ўқув йилидан бошлаб академияда магистратура мутахассисликлари бўйича кадрлар тайёрлашга асос солинган. Республикада илк марта магистратураси негизида прокурорлик фаолияти, тергов фаолияти ва коррупцияга қарши курашиш мутахассислиги бўйича тор доирадаги мутахассислар тайёрлашга асос солинди. Магистратурадаги ўқув жараёни кредит-модул тизими асосида ташкил этилиб, ўқитишнинг амалий хусусиятига ва прокуратура органларининг касбий фаолияти билан узвий боғлиқлигига асосланиши айтилди.

Шунингдек, янги малака ошириш тартибига кўра, энди прокуратура органларининг ҳар бир ходими уч йилда камида бир марта, давомийлиги бир ойдан кам бўлмаган малака ошириш курсида таҳсил олади.

Бундан ташқари, академияда прокуратура органларига ишга қабул қилинаётган ёшлар 6 ойлик касбга тайёрлов курсларини ўтайди. Шунингдек, академияда уч мутахассислик бўйича фалсафа доктори (PhD) ва фан доктори (DSc) илмий даражаларини бериш бўйича илмий кенгаш фаолият кўрсатади.

Академиянинг ўқув жараёнига амалиётга асосланган ва компетенсиявий ёндашув жорий этилиб, фаолиятнинг барча соҳалари рақамлаштирилиши замонавий ахборот-таълим муҳитида инновацион узвийликка ўтиш ҳамда электрон (масофавий) таълим механизмларини тўлиқ жорий этиш имкониятини берган.

Шундан сўнг журналистлар Коленко томонидан E-learning масофавий таълим дастурининг «ошхонаси», дея тарифланган мультимедиа марказига таклиф қилинди.

Криминалистика кабинети

Биз портлашдан сўнг кўздан кечириш учун терговчиларни тайёрлаймиз. Бунинг учун аввал реал ишлатилган портловчи ускуналарнинг схемаларини такрорлашади. Бундан 2 та мақсад бор: биринчидан унинг механизмини ўрганиш, иккинчидан оддий уй буюмларидек кўринадиган портловчи мосламаларни кўздан кечириш жараёнида олиб қўйиш, ундан фойдаланишни билиш. Биз АҚШнинг ФБР, яъни федерал тергов бюроси билан ҳамкорликда фаолият юритамиз.Истам Астанов, Жиноятчиликка қарши курашиш ва ҳуқуқбузарликлар профилактикаси тўғрисидаги қонунлар ижроси устидан назорат кафедраси доценти

Криминалистика полигонидаги квест

Ўқув тири

Пора билан боғлиқ жиноятларни фош этишда оператив ҳаракатларни ўргатувчи амалиёт хонаси

Дарс жараёнлари

Пандемия муносабати билан академияда барча йўналишлар бўйича таълим дастурлари масофавий таълим режимига ўтказилган. Академия қўшма илмий тадқиқотлар ўтказиш, норматив-ҳуқуқий, методик ва таҳлилий хусусиятга эга бўлган маълумотларни алмашиш, педагог, илмий ходимлар ва тингловчиларнинг стажировкаларини тизимли равишда ташкил этиш соҳаларида самарали халқаро ҳамкорликни амалга ошириб келаётгани қайд этилди.

Ҳозиргача 30 дан зиёд илмий ва таълим муассасалари билан ҳамкорлик алоқалари ўрнатилган, 20 нафар хорижий мутахассис узоқ муддатли асосда ўқув жараёнига жалб қилинган. Талабалар алмашинуви дастурларини амалга ошириш бўйича эришилган келишувлар асосида академия магистратураси талабалари ҳозирда хорижий таълим муассасаларида таҳсил олаётгани билдирилди.

Марказимизда ҳозирда халқаро донор ташкилотлар кўмагида 4 та халқаро лойиҳа амалга ошмоқда. Улардан бири 6 ойдан буён ишлаб келинаётган Тошкент шаҳри, Чилонзор туманига қаратилган бўлиб, тумандаги жиноятчилик ҳолатлари яхлит таҳлил қилинади. Ҳар бир жиноят тури сабаблари ўрганилиб, келгусида бартараф этишнинг аниқ механизмлари ишланади. Бу лойиҳа кейинчалик республиканинг бошқа ҳудудларида амалга оширилади. Ҳозирда лойиҳаларнинг кейинги босқичи социологлар, юристлар, психологлар ва бошқа мутахассислар иштирокида муҳокама қилинмоқда. Якуний хулосалар декабрь ойида берилади.

Носиржон Асқаров, Жиноятларнинг содир этилиши сабабларини тизимли таҳлил қилиш ва ўрганиш маркази бошлиғи