23-noyabr kuni O‘zbekiston Respublikasi Bosh prokuraturasi akademiyasida ommaviy axborot vositalari va blogerlar uchun muassasa rahbari Yevgeniy Kolenko boshchiligida press-tur tashkil etildi. Press-tur akademiya faoliyatiga oid 10 daqiqalik videolavha bilan boshlandi. Shundan so‘ng Yevgeniy Kolenko o‘quv muassasasining tarixi, vujudga kelish bosqichlari, o‘quv jarayonlarining o‘ziga xos jihatlari haqida gapirib berdi.

2018-yilda Bosh prokuratura oliy o‘quv kurslaridan akademiya etib qayta tashkil etilgan ta’lim dargohida o‘tgan davrda 6 000 nafarga yaqin huquqni muhofaza qilish organlari va davlat xizmatchilari akademiyada tahsil olgan. 2019/2020-o‘quv yilidan boshlab akademiyada magistratura mutaxassisliklari bo‘yicha kadrlar tayyorlashga asos solingan. Respublikada ilk marta magistraturasi negizida prokurorlik faoliyati, tergov faoliyati va korrupsiyaga qarshi kurashish mutaxassisligi bo‘yicha tor doiradagi mutaxassislar tayyorlashga asos solindi. Magistraturadagi o‘quv jarayoni kredit-modul tizimi asosida tashkil etilib, o‘qitishning amaliy xususiyatiga va prokuratura organlarining kasbiy faoliyati bilan uzviy bog‘liqligiga asoslanishi aytildi.

Shuningdek, yangi malaka oshirish tartibiga ko‘ra, endi prokuratura organlarining har bir xodimi uch yilda kamida bir marta, davomiyligi bir oydan kam bo‘lmagan malaka oshirish kursida tahsil oladi.

Bundan tashqari, akademiyada prokuratura organlariga ishga qabul qilinayotgan yoshlar 6 oylik kasbga tayyorlov kurslarini o‘taydi. Shuningdek, akademiyada uch mutaxassislik bo‘yicha falsafa doktori (PhD) va fan doktori (DSc) ilmiy darajalarini berish bo‘yicha ilmiy kengash faoliyat ko‘rsatadi.

Akademiyaning o‘quv jarayoniga amaliyotga asoslangan va kompetensiyaviy yondashuv joriy etilib, faoliyatning barcha sohalari raqamlashtirilishi zamonaviy axborot-ta’lim muhitida innovatsion uzviylikka o‘tish hamda elektron (masofaviy) ta’lim mexanizmlarini to‘liq joriy etish imkoniyatini bergan.

Shundan so‘ng jurnalistlar Kolenko tomonidan E-learning masofaviy ta’lim dasturining “oshxonasi”, deya tariflangan multimedia markaziga taklif qilindi.

Kriminalistika kabineti

Biz portlashdan so‘ng ko‘zdan kechirish uchun tergovchilarni tayyorlaymiz. Buning uchun avval real ishlatilgan portlovchi uskunalarning sxemalarini takrorlashadi. Bundan 2 ta maqsad bor: birinchidan uning mexanizmini o‘rganish, ikkinchidan oddiy uy buyumlaridek ko‘rinadigan portlovchi moslamalarni ko‘zdan kechirish jarayonida olib qo‘yish, undan foydalanishni bilish. Biz AQShning FBR, ya’ni federal tergov byurosi bilan hamkorlikda faoliyat yuritamiz.Istam Astanov, Jinoyatchilikka qarshi kurashish va huquqbuzarliklar profilaktikasi to‘g‘risidagi qonunlar ijrosi ustidan nazorat kafedrasi dotsenti

Kriminalistika poligonidagi kvest

O‘quv tiri

Pora bilan bog‘liq jinoyatlarni fosh etishda operativ harakatlarni o‘rgatuvchi amaliyot xonasi

Dars jarayonlari

Pandemiya munosabati bilan akademiyada barcha yo‘nalishlar bo‘yicha ta’lim dasturlari masofaviy ta’lim rejimiga o‘tkazilgan. Akademiya qo‘shma ilmiy tadqiqotlar o‘tkazish, normativ-huquqiy, metodik va tahliliy xususiyatga ega bo‘lgan ma’lumotlarni almashish, pedagog, ilmiy xodimlar va tinglovchilarning stajirovkalarini tizimli ravishda tashkil etish sohalarida samarali xalqaro hamkorlikni amalga oshirib kelayotgani qayd etildi.

 

Hozirgacha 30 dan ziyod ilmiy va ta’lim muassasalari bilan hamkorlik aloqalari o‘rnatilgan, 20 nafar xorijiy mutaxassis uzoq muddatli asosda o‘quv jarayoniga jalb qilingan. Talabalar almashinuvi dasturlarini amalga oshirish bo‘yicha erishilgan kelishuvlar asosida akademiya magistraturasi talabalari hozirda xorijiy ta’lim muassasalarida tahsil olayotgani bildirildi.

Markazimizda hozirda xalqaro donor tashkilotlar ko‘magida 4 ta xalqaro loyiha amalga oshmoqda. Ulardan biri 6 oydan buyon ishlab kelinayotgan Toshkent shahri, Chilonzor tumaniga qaratilgan bo‘lib, tumandagi jinoyatchilik holatlari yaxlit tahlil qilinadi. Har bir jinoyat turi sabablari o‘rganilib, kelgusida bartaraf etishning aniq mexanizmlari ishlanadi. Bu loyiha keyinchalik respublikaning boshqa hududlarida amalga oshiriladi. Hozirda loyihalarning keyingi bosqichi sotsiologlar, yuristlar, psixologlar va boshqa mutaxassislar ishtirokida muhokama qilinmoqda. Yakuniy xulosalar dekabr oyida beriladi.

Nosirjon Asqarov, Jinoyatlarning sodir etilishi sabablarini tizimli tahlil qilish va o‘rganish markazi boshlig‘i 

Akademiyaning 13 mingdan ortiq adabiyotlar fondiga ega bo‘lgan axborot-resurs markazi Alisher Navoiy nomidagi O‘zbekiston Milliy kutubxonasi, ilmiy resurslarning yirik agregatori EBSCO publishing, E-library ilmiy elektron kutubxonasi, Asian Journal of Comparativ Law, ProQuest dissertatsiya va diplom ishlari bazasiga ulangan bo‘lib, shuningdek, akademiyaga Scopus, Mendeley, ScienceDirect va Springer Nature axborot platformalari va resurslaridan foydalanish imkoniyati yaratilgan.