Фарғона вилоятининг Ўзбекистон туманида ўн минглаб аҳоли 30 соатдан буён электр таъминотисиз қолмоқда, дея хабар бермоқда «Дарё» мухбири. Ҳолатдан маҳаллий жамоатчилик вакиллари ҳам шикоят қилган.
Хусусан, блогер Исроил Тиллабоевнинг ёзишича, трансформатор куйиб кетгани сабаб «200 мингдан зиёд аҳолига бир суткадан буён электр берилмаяпти». Унинг қўшимча қилишича, «кеча кечқурун 200 дан зиёд аҳоли туман электр тармоқларига келиб жанжал кўтарган».
«Ҳокимият ходимлари мактаб, боғчаларни қишга тайёргарлигини текширавермай, электр тармоқлари, газ идораларининг ҳам тайёргарлигини текширса бўлмайдими? Халқнинг кундан кунга сабрини максимал даражада синаб, бирор кор-ҳол бошланишини кутмоқдами бу раҳбарлар? Ўзи кунда тузук ёнмаган токни энди тиккалай суткалаб бермасликни одат қилишга ўтдиларингми?», —деб эътироз билдирган блогер.
«Дарё» мухбирининг аниқлик киритишича, 22 ноябрь куни соат 8:10 да «табиий газ босимининг пастлиги оқибатида электр энергияси истеъмолининг ортиб кетиши» сабабли «Яйпан» нимстанциясидаги 16 минг кВА қувватга эга трансформатор пункти фавқулодда авариявий ўчган. Оқибатда Ўзбекистон туманидаги тўққизта — «Жангир», «Қушқўноқ», «Бузуқўрғон», «Тагоб», «Ислом», «Охта», «Бегобод», «Оталиқ» ва «Ўрмонобод» ҳаво тармоқлари электр энергияси таъминотидан узилган ва бешта маҳалла фуқаролар йиғинидаги қарийб 100 минг аҳоли электр таъминотисиз қолган.
Ўзбекистон тумани ҳокимлиги ахборот хизмати раҳбари Дилшоджон Жабборовнинг «Дарё» мухбирига маълум қилишича, туман ҳокими Қаҳрамонжон Жўраев бошчилигидаги масъуллар 22 ноябрдан буён электр тармоқлари корхонасида бўлиб, вазиятни назорат қилмоқда. Зудлик билан махсус бригадалар ташкил этилиб, авария ҳолатини бартараф этиш чоралари кўрилган. Натижада 22 ноябрь куни соат 19:00 да электр таъминоти қисман тикланган.
Айни вақтда вилоят «Ҳудудий электр тармоқлари» корхонаси мутахассислари томонидан трансформатор пунктида таъмирлаш ишлари давом эттирилмоқда. Туманнинг чироқсиз қолган маҳаллаларида электр таъминоти қачон тўлиқ тикланиши маълум қилинмаган.
Ўзбекистон тумани электр тармоқлари корхонаси мутахассисининг «Дарё» мухбирига берган маълумотига кўра, таъмирлаш ишлари якунлангунича аҳолига қўшни — Фурқат туманидан электр олиб берилади. Бундан ташқари, тумандаги саноат корхоналари учун мўлжалланган тармоқлардаги электр энергияси ҳам вақтинча аҳолига йўналтирилади.
Аввалроқ Фарғона прокуратураси вилоятнинг айрим ҳудудларида электр энергияси етказиб беришда 3 соатдан 28 соатгача узилишлар кузатилаётганини аниқлагани ҳақида хабар берилган эди. Proкуратура маълумотларига кўра, Ўзбекистон туманида 4 соатгача, Фурқат туманида эса 9 соатгача узилишлар кузатилган.
Қайд этиш жоиз, сўнгги бир ҳафтада Ўзбекистонда ҳаво ҳароратининг кескин совиши ортидан электр ва газ таъминотида жиддий муаммолар юзага келмоқда. Хусусан, Тўрақўрғон, Тахиатош ва Таллимаржон иссиқлик энергия станцияларида кетма-кет авариялар юз бергани маълум бўлди, шунингдек, Туркманистондан электр энергияси етказиб беришда ҳам узилишлар бўлган.
Изоҳ (0)