Англиянинг Бирмингем шаҳрида коронавирусга чалинган бемор сунъий кома ҳолатида эгизак фарзандини дунёга келтирди ва бу ҳақда 16 кундан кейин хабар топди, деб ёзади Меtrо.
Ҳомиладор Перпечуэл Уке ўзида коронавирус инфекциясининг илк белгиларини март ойида сезган. Аҳволи борган сари ёмонлашгани сабаб у шифохонага ётқизилган ва ўпкани сунъий нафас олдириш аппаратига уланган ҳамда медикаментоз комага туширилган.
Шифокорлар унинг тирик қолишига кафолат бера олмагани сабаб 10 апрель куни, ҳомиладорлигининг 26 ҳафтасида у кесарча кесиш амалиётини бошидан ўтказган (ҳомиладорликнинг нормал давомийлиги ўртача 38 ҳафтани ташкил этади). Эгизакларнинг қизалоғи 770 грамм, болакай эса 850 грамм туғилган. Уке эса яна 16 кун ҳушсиз ётган.
Аёл ўзига келганида эгизаклар ростан ҳам ўзининг фарзандлари эканлигига ишонмаган. Унга суратлари намойиш этилгач, уларнинг кичкиналигидан шокка тушган. Уке қизига Сочика Палмер, ўғлига — Осиначи Паскал деб исм қўйган. Шифокорларнинг айтишича, болалар қариндошлари ва яқинларининг дуоси билан омон қолган.
Чақалоқлар туғилганидан 116 кун ўтиб, уларга шифохонадан жавоб берилган. Укенинг таъкидлашича, кун ўтган сайин болаларнинг аҳволи яхшиланмоқда.
Эслатиб ўтамиз, май ойида Тошкентда коронавирусга чалинган юраги хаста ҳомиладор аёл фарзандли бўлган эди.
Изоҳ (0)