2020 йилда Қорбобо ва Санта Клауслар ўз соғлиғига эҳтиёт бўлиши керак. Сабаби уларнинг ёши коронавирус касаллигининг хавфи юқори бўлган тоифага киради. Бельгия соғлиқни сақлаш вазири маҳаллий Санта Клаусларга мамлакатнинг COVID-19’га нисбатан чекловларни бузишга рухсат берган бўлса, АҚШ ва Европанинг айрим мамлакатларида уларни шиша орқасига яширишади, шунингдек, болаларни тиззаларида олиб ўтириш тақиқланади, деб хабар беради Meduza.
Гап Санта Клаусларнинг савдо марказида ишлаши ҳақида кетмоқда. Ҳар йили болалар ота-оналари билан у ерга ташриф буюриб, Қорбобо билан суратга тушар ва совғалар олар эди. Бироқ пандемия туфайли урф-одатларни қайта кўриб чиқишга тўғри келди. Баъзи савдо марказларида болалар Санта билан икки метр масофадан мулоқот қилиши керак. Бироқ Данияда уларга умуман мурожаат қилиш тақиқланди. Шунинг учун ҳам Санталар у ерда шаффоф шар ичида жойлашади.
Яна баъзи жойларда ниқобсиз болалар тингланмайди ва улар билан суратга ҳам тушилмайди. Айрим харид қилиш марказларида болалар Қорбобони кўрганда қучоқлаб олмаслиги учун барча совға қути ва безаклар Санта Клаус атрофига жойлаштирилади.
Бундан ташқари кўпгина савдо марказларида электрон навбат ҳам режалаштирилмоқда, бу одамлар йиғилишининг олдини олади. Ходимлар Қорбобонинг совғалари, безаклар, кресло ва Санта Клауснинг қўлини доимий равишда артиб туради. Айтганча, Санта Клаус одамлардан дам олиши учун унинг иш вақти ҳам қисқартирилади. Умуман олганда, йил қандай ўтган бўлса, байрам ҳам шу каби нишонланади.
Изоҳ (0)