Президент Шавкат Мирзиёев 20 ноябрь куни «Ўзбекфильм» киностудиясида кинематография вакиллари билан бўлиб ўтган учрашувда Ўзбекистондаги мактабларга таниқли ўзбек киноижодкорларининг номларини беришни тавсия қилди.

Фото: Президент матбуот хизмати

«Президентимиз миллий кино санъатимиз фидойиларини эътироф этиш мақсадида ҳар бир ҳудуд умумтаълим мактабларига Раззоқ Ҳамроев, Шукур Бурҳонов, Наби Раҳимов, Ҳамза Умаров, Лутфихоним Саримсоқова каби эл севган ижодкорлар номини беришни таклиф қилди», — дейилади Президент матбуот хизмати ахборотида.

Фото: Президент матбуот хизмати

Энг сара ўзбек фильмлари 100 талигини тузиб, телеканалларда намойиш қилиш бўйича тавсиялар берилган. Бундан ташқари, жаҳон киносаноати ютуқларини ўрганиш ва татбиқ этиш, ижодкорлар малакасини ошириб бориш, хусусан, ёшларни Россия давлат кинематография институтида ўқитиш бўйича фикрлар билдирилган.

Шунингдек, болалар учун киностудия ташкил қилиш ғояси ҳам илгари сурилган.

Аввалроқ Ўзбекистонда хизмат кўрсатган артист Клара Жалилова 20 ноябрь куни 82 ёшида ҳаётдан кўз юмгани ҳақида хабар берилганди.