Халқ таълими вазири Шерзод Шерматов раҳбарлигида 2020 йил 14 ноябрь куни Қарши шаҳрида таълим сифати ва самарадорлигини оширишга бағишланган йиғилиш ўтказилди. Унда битирувчиларнинг олий таълимга кириш бўйича энг юқори ва энг паст кўрсаткичга эга бўлган умумтаълим мактаблари қиёсий таҳлил қилинди, дея «Дарё»га хабар бермоқда Халқ таълими вазирлиги матбуот хизмати.
Таъкидланишича, тадбирда олий таълим муассасаларига бирорта ҳам битирувчиси ўқишга кирмаган 191 та мактаб директорлари фаолиятига баҳо берилган. Мажлисда узоқ йиллар давомида фаолият кўрсатиб, аммо натижага эришмаган 20 нафар мактаб директори ишдан олинган. Яна кўплаб директорларни ҳам лавозимидан озод этиш бўйича топшириқ берилган.
Битирувчиси олий таълимга кириш кўрсаткичлари бўйича юқори натижага эришган Косон туманидаги 88-сонли мактаб жамоасига компьютер синфи совға қилинди. Ғузор туманидаги 68-сонли ихтисослаштирилган мактаб ва Шаҳрисабз туманидаги 7-сонли мактаб-интернати директорлари ва тўрт нафар фан ўқитувчилари «Халқ таълими фидойиси» кўкрак нишони билан тақдирланди, дейилади вазирлик ахборотида.
Йиғилишда рейтинг кўрсаткичлари баланд мактаб директорлари кўрсаткичи паст мактаблар билан ҳамкорликда ишлаши бўйича таклифлар берилган. Шунингдек, халқ таълими вазири мутасаддиларга таълим сифати ва самарадорлигини ошириш, келгусида юқори билим ва малакага эга ўқитувчиларни рағбатлантириш зарурлигини таъкидлаган.
Мавзуга доир:
- Битирувчиларнинг ОТМга кириш кўрсаткичлари бўйича энг катта ўсиш қайси вилоятда қайд этилгани маълум қилинди
- Фото: Деҳқонободдаги ўрта асрларни эслатувчи мактаб филиали 40 кунда қайта таъмирланди
- Зоир Мирзаев: «Қашқадарёда 2021 йил якунигача пахсадан қурилган мактаблар қолмайди»
- Қашқадарёдаги пахсадан қурилган мактабларни қайта қуриш ва таъмирлаш учун республика бюджетидан 250 млрд сўм ажратилади
Изоҳ (0)