Sherzod Shermatov boshchiligidagi yig‘ilishda birorta bitiruvchisi OTMga kirmagan Qashqadaryodagi 20 ta maktab direktori ishdan olindi

Xalq ta’limi vaziri Sherzod Shermatov rahbarligida 2020-yil 14-noyabr kuni Qarshi shahrida ta’lim sifati va samaradorligini oshirishga bag‘ishlangan yig‘ilish o‘tkazildi. Unda bitiruvchilarning oliy ta’limga kirish bo‘yicha eng yuqori va eng past ko‘rsatkichga ega bo‘lgan umumta’lim maktablari qiyosiy tahlil qilindi, deya “Daryo”ga xabar bermoqda Xalq ta’limi vazirligi matbuot xizmati.

Ta’kidlanishicha, tadbirda oliy ta’lim muassasalariga birorta ham bitiruvchisi o‘qishga kirmagan 191 ta maktab direktorlari faoliyatiga baho berilgan. Majlisda uzoq yillar davomida faoliyat ko‘rsatib, ammo natijaga erishmagan 20 nafar maktab direktori ishdan olingan. Yana ko‘plab direktorlarni ham lavozimidan ozod etish bo‘yicha topshiriq berilgan.

Bitiruvchisi oliy ta’limga kirish ko‘rsatkichlari bo‘yicha yuqori natijaga erishgan Koson tumanidagi 88-sonli maktab jamoasiga kompyuter sinfi sovg‘a qilindi. G‘uzor tumanidagi 68-sonli ixtisoslashtirilgan maktab va Shahrisabz tumanidagi 7-sonli maktab-internati direktorlari va to‘rt nafar fan o‘qituvchilari “Xalq ta’limi fidoyisi” ko‘krak nishoni bilan taqdirlandi, deyiladi vazirlik axborotida.

Yig‘ilishda reyting ko‘rsatkichlari baland maktab direktorlari ko‘rsatkichi past maktablar bilan hamkorlikda ishlashi bo‘yicha takliflar berilgan. Shuningdek, xalq ta’limi vaziri mutasaddilarga ta’lim sifati va samaradorligini oshirish, kelgusida yuqori bilim va malakaga ega o‘qituvchilarni rag‘batlantirish zarurligini ta’kidlagan.