Ўзбекистонда янги туғилган чақалоқни коронавирус инфекциясига текширув туғилгандан сўнг 12-24 соат ўтгач амалга оширилади. Бу ҳақда Коронавирусга қарши кураш штаби аъзоси Барно Абдусаматова маълум қилди.
Натижаларни тасдиқлаш учун такрорий тест 24 соатдан кейин амалга оширилади. Текширув учун биоматериал сифатида бурун-ҳалқум ёки оғиз-ҳалқумдан суртма олинади. Янги туғилган чақалоқларда коронавирус инфекцияси ҳолатлари нисбатан кам қайд этилган, барча ҳолатлар енгил шаклда кечган.«Бу гап билан биз барча чақалоқлардан суртма олинади ва коронавирусга текширув ўтказилади, демоқчимасмиз. Коронавирус билан касалланган ҳомиладор аёлларда бу текширув ўтказилади», — дейди мутахассис.
Эслатиб ўтамиз, аввалроқ коронавирусга чалинган аҳволи оғир ёки ўта оғир ҳомиладорлар муддатига қарамай туғдирилиши кераклиги, ҳомиладорларнинг иситмаси кўтарилса, у COVID-19 билан касалланган ёки касалланмаганидан қатъи назар, стационарга юборилиши шартлиги, Ўзбекистонда туғруқхонага келаётган ҳомиладор аёллардан тест топшириб келиш талаб этилмаслиги, коронавирусга чалинган ҳомиладор аёллар учун қандай шароитлар яратилгани, Коронавирусга қарши курашиш штаби аъзоси, профессор Ҳабибулло Оқилов эмизикли оналар коронавирусга чалинган бўлса, фарзандини қандай эмизиши борасида аниқлик киритиб ўтгани ҳақидаги хабарлар ҳам берилган эди.
Мавзуга доир:
Изоҳ (0)