Наманган вилоятидаги автомобилларга газ тўлдириш шохобчаларида чекловлар жорий этилди. Бу ҳақда вилоят ҳокимининг ўринбосари Саидаҳмад Султонов журналистлар билан ўтказилган матбуот анжуманида маълум қилди, дея хабар беради «Дарё» мухбири Азизбек Абдувалиев.
«Водийда энг охири биз шундай чекловларни жорий қилдик. Энергетика вазирлиги томонидан киритилган тизим бўйича аҳоли ва ижтимоий соҳа объектларига куз-қиш мавсумида табиий газ етказиб беришни узлуксиз таъминлаш мақсадида шундай қилинди. Тўғри, автотранспортнинг деярли 90 фоизи газга ўтиб бўлди, турнақатор навбатлар юзага келяпти, лекин кунлар совиб кетганлиги учун биринчи галда аҳоли эҳтиёжини ҳисобга олишга мажбурмиз», — деди вилоят ҳокимининг ўринбосари.
Султоновга кўра, чекловлар 8 ноябрдан кучга кирган ва автомобилларга газ тўлдириш шохобчаларига ҳар куни соат 18:00 дан тонгги соат 6:00 гача газ етказиб бериш вақтинча тўхтатилади.
Журналистларнинг бу чекловлар ортидан йўлкира нархлари ошиб кетиши борасидаги хавотирларига жавобан жамоат транспортида нархлар кўтарилмаслиги, турли уюшмаларга кирувчи йўловчи ташиш билан шуғулланувчи корхоналарда ҳам нарх-наво назоратга олиниши маълум қилинди.
Изоҳ (0)