Коррупцияга қарши курашиш агентлиги ҳозирга қадар амалга оширилган ишлар юзасидан ҳисобот берди. Унда қайд этилишича, агентлик ташкил этилгандан буён 2020 йилнинг 1 ноябрга қадар 275 та мурожаат келиб тушган. Шундан 243 таси (88,4 фоизи) белгиланган тартибда кўриб чиқилган.
Агентлик мурожаатлар юзасидан олиб борган ўрганишлари натижасида, кўп қаватли арзон уй-жойларга фотоэлектр тизимини ўрнатиш бўйича тендер савдоларини ташкил этишда қоидабузилиш ҳолатлари қайд этилган. Шу каби қуёш фотоэлектр тизимларини Қорақалпоғистон Республикаси, Бухоро, Қашқадарё, Тошкент ва Наманган вилоятларида қурилаётган 528 та хонадонга ўрнатиш белгиланган.
Аниқланишича, кўп қаватли арзон уй-жойларга фотоэлектр тизимини ўрнатиш ишларини бажариш бўйича пудратчи ташкилотларни танлаб олиш жараёнлари, Президентнинг 2019 йил 28 ноябрдаги «Ипотека кредити механизмларини такомиллаштиришга оид қўшимча чора-тадбирлар тўғрисида»ги фармони талабларига амал қилинмасдан ташкил этилган.
«Шу муносабат билан, агентлик томонидан масъул идораларга тақдимнома киритилди. Натижада, ‘Қишлоқ қурилиш инвест’ ИК МЧЖ Қорақалпоғистон Республикаси, Бухоро, Қашқадарё ва Наманган вилоятлари ҳудудий филиаллари томонидан қуёш фотоэлектр тизимларини ўрнатиш бўйича танлов (тендер) савдолари ўтказмасдан пудратчи ташкилотлар билан олдин тузилган арзон уй-жойлар қурилиши шартномаларига қўшимча келишувлар бекор қилиниб, қонун ҳужжатларида белгиланган тартибда танлов савдолари қайта ташкил этилди», — дейилади хабарда.
Шу билан бирга, Тошкент вилоятида яшовчи тадбиркорнинг 400 миллион сўм пулларини фирибгарлик йўли билан қўлга киритган мансабдор шахсларга нисбатан чора кўрилмаётганлиги ва жиноят иши Жиноят процессуал кодексининг 84-моддаси 1-қисми 1-бандга асосан, ҳаракатдан тугатилганлигидан норозилигини билдирган. Жиноят иши ҳужжатлари агентлик томонидан ўрганиб чиқилиб, тергов бир томонлама ва тўлақонли ўтказилмагани сабабли, бош прокуратурага жиноят ишини ҳаракатдан тугатиш ҳақида қарорни бекор қилиш ҳақида тақдимнома киритилган.
Аввалроқ, Тошкентда лойиҳа қиймати 9,6 миллион доллар бўлган рақамли ситуацион марказ тендерсиз қурилгани тўғрисида хабар берилганди. Лойиҳа пудратчиси Power Construction Planet МЧЖ бўлиб, компания билан шартнома 7 октябрда имзоланган.
Изоҳ (0)