Korrupsiyaga qarshi kurashish agentligi hozirga qadar amalga oshirilgan ishlar yuzasidan hisobot berdi. Unda qayd etilishicha, agentlik tashkil etilgandan buyon 2020-yilning 1-noyabrga qadar 275 ta murojaat kelib tushgan. Shundan 243 tasi (88,4 foizi) belgilangan tartibda ko‘rib chiqilgan.
Agentlik murojaatlar yuzasidan olib borgan o‘rganishlari natijasida, ko‘p qavatli arzon uy-joylarga fotoelektr tizimini o‘rnatish bo‘yicha tender savdolarini tashkil etishda qoidabuzilish holatlari qayd etilgan. Shu kabi quyosh fotoelektr tizimlarini Qoraqalpog‘iston Respublikasi, Buxoro, Qashqadaryo, Toshkent va Namangan viloyatlarida qurilayotgan 528 ta xonadonga o‘rnatish belgilangan.
Aniqlanishicha, ko‘p qavatli arzon uy-joylarga fotoelektr tizimini o‘rnatish ishlarini bajarish bo‘yicha pudratchi tashkilotlarni tanlab olish jarayonlari, Prezidentning 2019-yil 28-noyabrdagi “Ipoteka krediti mexanizmlarini takomillashtirishga oid qo‘shimcha chora-tadbirlar to‘g‘risida”gi farmoni talablariga amal qilinmasdan tashkil etilgan.
“Shu munosabat bilan, agentlik tomonidan mas’ul idoralarga taqdimnoma kiritildi. Natijada, ‘Qishloq qurilish invest’ IK MChJ Qoraqalpog‘iston Respublikasi, Buxoro, Qashqadaryo va Namangan viloyatlari hududiy filiallari tomonidan quyosh fotoelektr tizimlarini o‘rnatish bo‘yicha tanlov (tender) savdolari o‘tkazmasdan pudratchi tashkilotlar bilan oldin tuzilgan arzon uy-joylar qurilishi shartnomalariga qo‘shimcha kelishuvlar bekor qilinib, qonun hujjatlarida belgilangan tartibda tanlov savdolari qayta tashkil etildi”, — deyiladi xabarda.
Shu bilan birga, Toshkent viloyatida yashovchi tadbirkorning 400 million so‘m pullarini firibgarlik yo‘li bilan qo‘lga kiritgan mansabdor shaxslarga nisbatan chora ko‘rilmayotganligi va jinoyat ishi Jinoyat protsessual kodeksining 84-moddasi 1-qismi 1-bandga asosan, harakatdan tugatilganligidan noroziligini bildirgan. Jinoyat ishi hujjatlari agentlik tomonidan o‘rganib chiqilib, tergov bir tomonlama va to‘laqonli o‘tkazilmagani sababli, bosh prokuraturaga jinoyat ishini harakatdan tugatish haqida qarorni bekor qilish haqida taqdimnoma kiritilgan.
Avvalroq, Toshkentda loyiha qiymati 9,6 million dollar bo‘lgan raqamli situatsion markaz tendersiz qurilgani to‘g‘risida xabar berilgandi. Loyiha pudratchisi Power Construction Planet MChJ bo‘lib, kompaniya bilan shartnoma 7-oktabrda imzolangan.
Izoh (0)