Италияда касалхонада тинчгина нонушта қилиб ўтирган эркакнинг қариндошлари хатолик сабаб унинг дафн маросимини ташкиллаштирди

Италиянинг Сора шаҳрида жойлашган касалхона ходими адашиб, ўз палатасида тинчгина нонушта қилиб ўтирган беморнинг оиласига уни коронавирусдан ўлди дея хабар бериб юборди. Бу ҳақда Wanted in Rome нашри маълум қилди.

Кеч тушганида касалхона ходимлари беморлардан бирининг оиласига қўнғироқ қилган. «Отангиз вафот этди, афсусдамиз», — дея унинг оиласига ҳамдардлик билдиришган.

Оила ушбу даҳшатли хабарни эшитган ва бу ҳақда қолган қариндош ҳамда дўстларини хабардор қилган. Италияликнинг қариндошлари дафн маросимларини ташкиллаштиришга тушиб кетган. Улар дафн ишлари билан шуғулланадиган агентга алоқага чиққан, улар эса шаҳар бўйлаб некрологли постерларни ёпиштиришни бошлаб юборган.

Тушунмовчилик кейинги куни, дафн бюроси тобутда ётган марҳумнинг суратини оилага юборганидан сўнг аниқланган. Коронавирус пандемияси сабаб жорий этилган чекловлар оиланинг бемор ётган касалхонага боришига тўсқинлик қилган, лекин унинг ташқи кўриниши бир неча кун ичида бунчалик ўзгариб кетиши мумкин бўлмаган.

Қариндошлар «марҳум»нинг белгиси — чандиғи йўқлигига ишонч ҳосил қилгач, уларнинг гумони тасдиқланган. Кекса эркакнинг аёл ва фарзандлари касалхонага мурожаат қилганидан сўнг, у соғ-омонлиги ва ўз палатаси нонушта қилиб ўтиргани аниқланган.

Аввалроқ Наманганда коронавирусга чалинган тирик фуқаронинг яқинларига унинг ўлгани ҳақида хабар берилгани маълум бўлганди.