Ўтган бир сутка ичида бутун дунё бўйлаб яна 628 136 кишида коронавирус тасдиқланди. Бу пандемия бошланганидан буён сутка давомида қайд этилган энг юқори кўрсаткич. Инфекциянинг кунлик тарқалиши статистикаси Жаҳон соғлиқни сақлаш ташкилотининг сайтига жойлаштириб борилмоқда.
Бутун дунёда коронавирус билан касалланганлар сони ҳозирда 52,48 миллион кишидан ошди.
ЖССТ маълумотларига кўра, энг кўп касалланиш ҳолати АҚШда қайд этилган. Мамлакатда бир сутка ичида 142 076 киши COVID-19’га чалинган, касалланганларнинг умумий сони 10,2 миллион кишидан ошган. Вирус тарқалишини реал вақтда кузатиб келаётган Жонс Ҳопкинс университети маълумотларига кўра, АҚШда 10,6 миллиондан ортиқ одамда коронавирус тасдиқланган.
Ўтган бир сутка ичида қайд этилган касаллар сонининг кўплиги бўйича иккинчи ўринда Бразилия кетмоқда — 48 331 бемор. Мамлакатда COVID-19’га чалинганларнинг умумий сони 5 миллион кишидан ошган.
Рўйхатнинг «кучли учлигига» Ҳиндистон якун ясаган — бир суткада 44 879 бемор. Ушбу мамлакатда коронавирусга чалинганлар сони 8 миллион кишидан ортиқни ташкил этмоқда.
Эслатиб ўтамиз, бундан олдинги бир сутка давомида АҚШ ва Россияда COVID-19’га чалинишлар сони бўйича антирекорд янгиланганди. Шунингдек, 4—11 ноябрь кунлари дунёда коронавирусга чалинганлар сони икки марта рекорд даражага чиққан.
Изоҳ (0)