Ўзбекистон Республикаси таълим муассасаларига ўқишга қабул қилиш бўйича давлат комиссияси мажлисининг 7-сон баёни қарорига мувофиқ, 101 нафар чин етим абитуриент давлат гранти асосида талабаликка қабул қилинди. Бу ҳақда «Халқ сўзи online» хабар берди.
Маълум қилинишича, мазкур абитуриентларни талабаликка қабул қилиш «SOS-Ўзбекистон болалар маҳаллалари» уюшмаси, Олий ва ўрта махсус таълим вазирлиги, Давлат тест маркази, вазирлик ва идораларнинг мурожаатлари ҳамда Меҳрибонлик уйи ва Болалар шаҳарчасининг битирувчилари бўлган чин етим 101 нафар абитуриентнинг ёзма аризаларига мувофиқ амалга оширилган.
Унга кўра, ота-онаси йўқ, чин етим болаларни ҳар томонлама қўллаб-қувватлаш, ҳаётда ўз ўрнини топишига кўмаклашиш мақсадида, мазкур абитуриентлар Меҳрибонлик уйи ва Болалар шаҳарчасининг битирувчилари бўлган чин етимлар учун давлат гранти асосида ажратилган қабул параметрларида тўлдирилмаган ўринлар ҳисобидан олий таълим муассасаларига давлат гранти асосида талабаликка қабул қилинди.
Аввалроқ Ўзбекистон олий таълим муассасаларида бакалавриат ва магистратуранинг биринчи босқич талабалари, шунингдек, ўқишини кўчирган талабалар учун контракт пулини тўлаш муддати 2020 йил 1 декабргача узайтирилгани ҳақида хабар берилганди.
Изоҳ (0)