Қашқадарё вилоятининг Чироқчи туманидаги 300 йиллик тарихга эга Бобошер жоме масжиди фаолияти сохта ҳужжатлар асосида тугатилиб, гувоҳномаси Китоб туманида жойлашган Ҳазрати Башир жоме масжидига бериб юборилди. Бу ҳақда «Дарё»га хабар берган чироқчиликларнинг маълум қилишича, сохта ҳужжат масжиднинг собиқ имом хатиби Шуҳрат Равшанов томонидан тайёрланган ва имзолар ҳам сохталаштирилган.
Мазкур муаммони ўрганишни мақсад қилган «Дарё» мухбири Отабек Қўлдошев Чироқчи туманининг Оқтўнли қишлоғида бўлди.
«Масжидимизнинг ёпилишига сабабчи бўлган инсон бу — Раҳматилла Усмонов. У инсонни мен ҳурмат қилардим. Бирга ҳаж сафарига бориб келгандик. Аммо ёлғон гапириб, биз намозхонларни Аллоҳнинг даргоҳи бўлмиш масжиддан айирди. Масжидимиз гувоҳномаси Китоб туманидаги Ҳазрати Башир зиёратгоҳи масжидига бериб юборилди. Раҳматилла Усмонов бу қинғир ишини бажаришда масжидимизнинг ўша пайтдаги имоми Шуҳрат Равшановдан фойдаланди», — дейди масжид намозхонларидан бири Шодиёр ҳожи Эргашев.
«Дарё» мухбири билан суҳбатлашган оқтўнлиликларнинг айтишича, масжид фаолияти 2019 йил 1 ноябрь куни тугатилган. Аммо аҳоли масжид фаолияти тугатилганидан 2020 йил 24 февраль куни хабар топган. Масжид ёпилишининг сабабини билиш мақсадида Қашқадарё вилоят Адлия бошқармасига борган мурожаатчиларга эса «масжид фаолиятини давом эттиряпти, ҳали ёпилгани йўқ», деган жавоб берилган.
«Масжидимизни сохта қарор билан ёпишган, — дейди яна бир намозхонлардан бири Омондавлат Жуманов. — Масжидимизнинг ўша пайтдаги имоми Шуҳрат Равшанов 2019 йил 27 июль куни масжид масъуллари иштирокида умумий йиғилиш ўтказилди, деб сохта қарор тайёрлаган. Масжид имоми ўтказилмаган йиғилишни ўтказилди деб, йиғилиш баённомасини тайёрлаган ва унда ‘МФЙ раиси сўзга чиқиб, Бобошер жоме масжидига эҳтиёж йўқлигини, шу масжиддан 4,5 км узоқликда масжид борлигини айтиб, ёпиш керак, деди’ дея сохта қарор тайёрлаган. Энг ёмони сохта қарорда ўзга шахс номидан имзо ҳам қўйган».
«Қумдарё» МФЙ раиси Шерзод Абдухолиқовнинг тасдиқлашича, у масжид масъуллари томонидан ташкил этилган ҳеч қандай йиғилишда иштирок этмаган бўлса-да, йиғилиш баёнида унинг сўзга чиққани, масжидга эҳтиёж йўқлигини айтгани ёзилган.
«Мен масжид ёпилишига бағишланган йиғилишда иштирок этмаганман. Ҳолбуки, йиғилишда иштирок этмасам-да, менинг номимдан масжидга эҳтиёж йўқлиги, масжиддан 4,5 км узоқликда Оқтош диний ташкилоти борлигини айтганим ёзилган. Мазкур ҳужжат сохталаштирилган. Мен депутат ва МФЙ раиси сифатида бу сохта ҳужжат ҳақида Мусулмонлар идорасининг вилоятдаги масъулларига хабар бердим. Лекин ҳалигача улар бу сўровимга жавоб беришмаган», — дейди МФЙ раиси Шерзод Абдухолиқов.
Аҳоли вакиллари томонидан сохта деб айтилаётган ҳужжатда йиғилиш котиби дея кўрсатилган Холмирза Тожиев ҳам ҳужжатдаги имзо унга тегишли эмаслигини айтмоқда.
«Масжидни ёпиш ҳақидаги йиғилиш баёнида мени йиғилиш котиби сифатида киритишиб, номимдан имзо ҳам қўйишган. Аслида бу йиғилишда мен умуман иштирок этмаганман. Ҳеч қандай ҳужжатга имзо ҳам қўймаганман. Демакки, имзомни ҳам сохталаштиришган», — дейди шу масжидда 12 йил мутаввали бўлиб ишлаган Холмирза Тожиев.
«Дарё» мухбири йиғилишда иштирок этгани ёзилган яна бир масъул, Чироқчи туман имом хатиби Бекзод Норқулов билан суҳбатлашганда масъул ушбу йиғилишда иштирок этмаганини, ҳужжатда туман имом хатиби йиғилишда иштирок этди, деган гап ёлғонлигини таъкидлади.
«Мен Бобошер жоме масжидини ёпиш ҳақидаги умумий йиғилишда иштирок этмаганман. Менинг иштирок этганим ёзилган ҳужжат сохта», — дейди Мусулмонлар идорасининг тумандаги вакили Бекзод Норқулов.
Мазкур вазиятга ойдинлик киритиш мақсадида Бобошер жоме масжидининг собиқ имоми, айни кунда бошқа ҳудуддаги масжидга имомлик қилаётган Шуҳрат Равшанов билан боғландик ва аҳоли томонидан сохталиги айтилаётган ҳужжат ҳақида сўрадик. Журналист эканлигимизни билган Шуҳрат Равшанов саволимизни эшитгач бироздан сўнг қайта қўнғироқ қилишини айтиб, телефон гўшагини қўйди. Бироздан сўнг эса унинг телефони батамом ўчирилгани маълум бўлди.
Оқтўнлиликларнинг қўшимча қилишича, масжид ёпилишига бош-қош бўлган Шуҳрат Равшанов унга никоҳ ўқитмай қўйган аҳолини шу йўл билан жазолаган.
«Шуҳрат Равшанов масжидимизга имом этиб тайинлангач никоҳ ўқиш нархини 200 минг сўмгача оширди. Шунингдек, аҳоли имомнинг икки никоҳли эканлигини эшитгач унга никоҳ ўқитмай қўйди. Бу эса масжид имоми Шуҳрат Равшановга маъқул келмади. Ва у аҳолининг ишлаб турган масжидини ёпиш билан уларни жазолади», — дейди оқтўнлиликлар.
Айтилишича, аҳоли масжид ёпилди деган гаплардан хабар топгач Мусулмонлар идорасининг вилоятдаги масъули Раҳматилла Усмоновнинг олдига ҳам борган. Дин пешвоси ҳам «масжидингиз фаолияти тугатилмаган, намоз ўқишда давом этаверинг», деган жавобни бериш билан кифояланган.
«Раҳматилла Усмонов ҳамда вилоят Адлия бошқармаси масъулларининг олдига 50 маротабадан кўп бордик. Ҳар сафар борганимизда масжид фаолияти тугатилмаган, ишлашни давом эттиради деган жавобни беришарди. 2020 йил 3 октябрь куни борганимизда эса масжид ёпилди, қаерга борсангиз боринг, деган жавобни беришди. Масжид ёпилишига сабаб нима? Мусулмонлар идорасининг масжид ёпилганлиги тўғрисидаги ҳужжатини кўрсатинг десак, кўрсатишмади», — дейди Шодиёр ҳожи Эргашев.
«Дарё» мухбири билан суҳбатлашган Раҳматилла Усмонов эса Бобошер жоме масжиди ёпилмаганини, шунчаки ҳужжатларида камчилик борлигини маълум қилди.
«Шахсан ўзим менинг ёнимга келган намозхонларга масжид ҳужжатларида камчилик борлигини айтиб, тўғрилашларини сўрадим. Масжид ёпилмаган. Фаолиятини давом эттиради. Фақат ҳужжатларидаги камчилик тузатилса, бас», — деди Раҳматилла Усмонов.
Бобошер жоме масжиди ёпилдими ёки йўқми деган саволимизга Қашқадарё вилоят Адлия бошқармасидан ҳам тайинли жавоб бўлмади. Бироқ бизга тақдим этилган ҳужжатларда эса масжид имом хатибининг сохта қарори асосида бошқарманинг ўша пайтдаги бошлиғи Музроп Икромовнинг 2019 йил 1 ноябрдаги буйруғи билан Бобошер жоме масжиди қайта рўйхатдан ўтказилган. Шунга кўра, Бобошер жоме масжидининг нафақат гувоҳномаси, ҳисоб рақами ҳам Ҳазрати Башир зиёратгоҳидаги масжидга бериб юборилган.
Ушбу ҳолат юзасидан Адлия вазирлиги ва Ўзбекистон Мусулмонлари идораси ўрганиш ўтказиб, муносабат билдириши мақсадга мувофиқ кўринади.
Изоҳ (0)